Mbledhja e Këshillit Bashkiak të Maliqit, e thirrur për të diskutuar Reformën Territoriale, është shoqëruar me tensione dhe debate, duke përfunduar pas rreth 20 minutash. Këshilltarët e mazhorancës braktisën sallën, ndërsa opozita dhe qytetarët vijuan reagimet.

Mbledhja ishte parashikuar të zhvillohej rreth orës 10:00 dhe kishte në rend dite miratimin e qëndrimit zyrtar të Këshillit Bashkiak Maliq për t’ia përcjellë Kuvendit në kuadër të procesit të rishikimit të ndarjes administrativo-territoriale.

Sipas raportimeve, grupi i këshilltarëve të majtë kishte deklaruar se nuk do të merrte pjesë në vendimmarrje për propozimin që duhet t’i dërgohet Parlamentit. Pas kësaj, kryetari i Këshillit Bashkiak njoftoi mbylljen e mbledhjes, vendim që shkaktoi reagime nga këshilltarët e opozitës dhe qytetarët e pranishëm.

Në pak sekonda, këshilltarët e mazhorancës u larguan nga salla, ndërsa pjesëtarët e opozitës vijuan deklaratat dhe kundërshtimet e tyre.

Situata u tensionua më tej kur një i moshuar hyri në sallë me një shkop në dorë dhe debatoi me kryetarin e Këshillit Bashkiak, duke kundërshtuar mbylljen e mbledhjes. Pamjet nga situata kanë tërhequr vëmendje për tensionet e krijuara gjatë diskutimit për Reformën Territoriale.