Detaje të reja nga dosja hetimore hedhin dritë mbi kërcënimet dhe përndjekjen që, sipas dëshmive të mbledhura nga autoritetet, Refit Buzi i kishte bërë ish-të fejuarës së tij muaj përpara tragjedisë në Vidhisht të Roskovecit. Në nëntor 2025 ai ishte arrestuar për “Kanosje” dhe “Përndjekje”, por më pas ishte lënë i lirë.

Sipas materialeve hetimore, ish-e fejuara e Buzit, Rosalinda Plaka, kishte bërë denoncime në polici, duke deklaruar se ai e kërcënonte dhe e përndiqte vazhdimisht. Ajo kishte paralajmëruar se ndihej e rrezikuar për jetën, ndërsa në një prej rasteve Buzi dyshohet se e kishte kërcënuar me fjalët: “Do të vras nëse ndahesh prej meje” dhe se nuk do ta linte të qetë nëse e shihte me një person tjetër.

Dosja përshkruan edhe një tjetër formë presioni. Sipas dëshmisë së Rosalindës, Buzi i kishte dërguar video dhe materiale intime, duke e kërcënuar se do t’i publikonte në rrjetet sociale. Ajo deklaroi gjithashtu se ai kishte hapur një adresë false me fotografitë e tyre dhe e kishte detyruar të takohej me të, ndërsa gjatë takimeve e kishte kërcënuar dhe tentuar ta çonte me forcë në hotel.

Situata u përshkallëzua në nëntor 2025. Më 17 nëntor, policia u njoftua se Rosalinda ishte kërcënuar me armë në Tiranë. Buzi u lokalizua dhe u arrestua, ndërsa në kuadër të hetimit u ngritën ndaj tij akuzat për “Përndjekje” dhe “Kanosje”. Gjykata e Shkallës së Parë vendosi masën “arrest në burg”, vendim që u la në fuqi edhe nga Apeli i Tiranës më 22 dhjetor 2025.

Megjithatë, sipas materialeve të bëra publike, Buzi më vonë doli nga qelia, ndërsa rrethanat e ndryshimit të masës së sigurisë mbeten për t’u sqaruar. Në korrik 2026, ai dyshohet se vrau me armë gjahu prindërit e ish-të fejuarës së tij, Kosta dhe Belere Plaka, në Vidhisht të Roskovecit, ndërsa më pas e mori peng Rosalindën. Pas rrethimit nga policia dhe forcat RENEA, Buzi vrau veten.

Rasti ka rikthyer në vëmendje denoncimet e bëra muaj përpara tragjedisë dhe mënyrën se si u trajtuan ato nga institucionet. Materialet hetimore tregojnë se autoritetet ishin vënë në dijeni për kërcënimet dhe sjelljen e dhunshme të Buzit, ndërsa tashmë hetimet synojnë të sqarojnë edhe rrethanat që çuan në lirimin e tij përpara ngjarjes së rëndë.