SHBA – Francis Clifford Smith, një nga të burgosurit që ka kaluar periudhën më të gjatë në burg në historinë e Shteteve të Bashkuara, ka ndërruar jetë në moshën 101-vjeçare, pas më shumë se shtatë dekadash pas hekurave.

Smith ishte dënuar me vdekje në vitin 1950 për vrasjen e Grover Hart, një roje nate në një klub jahtesh në Connecticut. Në atë kohë ai ishte 25 vjeç dhe gjithmonë ka këmbëngulur se nuk ishte autor i krimit.

Ekzekutimi i tij ishte planifikuar disa herë. Smith e kishte konsumuar tetë herë vaktin e fundit, por në secilin rast ekzekutimi ishte shtyrë ose dënimi ishte ndryshuar.

Me kalimin e viteve, çështja e tij u shoqërua me dyshime gjithnjë e më të mëdha. Disa dëshmitarë të rëndësishëm të procesit të parë tërhoqën deklaratat e tyre, ndërsa një tjetër i burgosur pretendoi më vonë se ishte ai që kishte kryer vrasjen.

Dyshime për fajësinë e Smithit shprehu edhe majori Leo Carroll, një prej oficerëve që e kishte marrë në pyetje pas arrestimit. Përpara Bordit të Faljeve, ai deklaroi se nuk ishte i sigurt nëse Smith kishte qenë fare i pranishëm në momentin e vrasjes.

Në vitin 1954, dënimi me vdekje iu shndërrua në burgim të përjetshëm.

Smith kaloi pjesën më të madhe të jetës në burg, me vetëm disa periudha të shkurtra jashtë tij. Në vitin 1967 u arratis dhe u arrestua 12 ditë më vonë. Në vitin 1974 iu lejua të kalonte Krishtlindjet në shtëpi, por u kthye në burg të nesërmen.

Një vit më vonë ai u lirua me kusht, por qëndroi jashtë burgut për rreth 10 muaj. Më pas u arrestua për vepra të tjera, përfshirë vjedhje dhe posedim arme, duke shkelur kushtet e lirimit.

Pavarësisht përpjekjeve të mëvonshme për rikthimin e tij në sistemin e lirimit me kusht, Smith nuk pranoi disa prej tyre. Vetëm në vitin 2020 iu lejua të dilte nën mbikëqyrje dhe u transferua në një qendër kujdesi për të moshuar.

Gjatë dekadave në burg, Smith u bë i njohur edhe me nofkën “Njeriu i Zogjve i Osbornit”, pasi ushqente zogjtë në ambientet e burgut. Sipas një zyrtari të Departamentit të Korrektimeve të Connecticut, ai fuste bukë në rrobat e tij për t’ua dhënë zogjve.

Historia e Smithit rikthen në vëmendje edhe plakjen e popullsisë së burgosur në SHBA. Sipas një studimi të vitit 2025, numri i të burgosurve 55 vjeç e lart u rrit me afro 400% gjatë periudhës 1991-2021.

Ndërkohë, Byroja e Regjistrimit të SHBA-së parashikon se deri në vitin 2030, të paktën një e treta e popullsisë së burgosur në vend do të jetë mbi 50 vjeç.