MANZË – Shkolla “Leonik Tomeo” ka reaguar me një mesazh prekës pas ndarjes nga jeta të 15-vjeçarit Alvi Muhaxhiri, i cili humbi jetën në aksidentin tragjik të ndodhur në orët e para të mëngjesit në Manzë.

Përmes një reagimi publik, stafi pedagogjik shpreh dhimbjen për humbjen e parakohshme të nxënësit, duke theksuar se ndarja e tij nga jeta ka lënë pas një boshllëk të madh te mësuesit dhe bashkëmoshatarët.

“Me hidhërim të thellë e zemër të thyer mësuam lajmin për ndarjen e parakohshme nga jeta të nxënësit tonë të dashur Alvi Muhaxhiri”, thuhet në mesazhin e shkollës.

Stafi i “Leonik Tomeo” i ka shprehur ngushëllimet familjes së 15-vjeçarit, ndërsa kujtimi i tij është përcjellë si një prani që do të mbetet në kujtesën e komunitetit të shkollës.

Alvi Muhaxhiri, vetëm 15 vjeç, ishte një nga tre personat që humbën jetën në aksidentin e rëndë automobilistik në Manzë. Në aksident mbetën të plagosur edhe dy persona të tjerë, të cilët vijojnë të marrin trajtim mjekësor.