TIRANË – Pesë vatra zjarri vijojnë të jenë aktive në vend, ndërsa strukturat e Mbrojtjes Civile dhe Forcat e Armatosura janë angazhuar në operacionet për izolimin dhe shuarjen e tyre.

Sipas përditësimit të Ministrisë së Mbrojtjes deri në orën 20:00, gjatë ditës janë evidentuar gjithsej 7 vatra zjarri. Pesë prej tyre mbeten aktive, ndërsa dy të tjera janë nën monitorim.

Në terren janë angazhuar rreth 130 forca operacionale vendore, ndërsa Forcat e Armatosura mbështesin operacionet me 90 efektivë dhe dy helikopterë të Forcës Ajrore.

Vatrat aktive janë në zonat e Dajtit dhe Priskës në Tiranë, Lufaj në Mirditë, Tërbun-Gojan në Pukë dhe Shashicë në Selenicë.

Situata më e ndjeshme raportohet në Tërbun-Gojan, ku erërat e forta kanë favorizuar përhapjen e flakëve. Forcat operacionale vijojnë ndërhyrjen në terren, ndërsa strukturat e MZSH-së janë përqendruar në mbrojtjen e banesave. Sipas Ministrisë së Mbrojtjes, aktualisht nuk raportohet rrezik për zonat e banuara.

Në Dajt, operacioni vijon me 50 efektivë të Forcave të Armatosura, 15 forca të MZSH-së dhe 5 forca të Agjencisë së Zonave të Mbrojtura. Edhe në Priskë vijojnë të jenë të angazhuara forcat e MZSH-së, ndërsa nuk raportohet rrezik për banesat.

Në Lufaj, zjarri mbetet aktiv me intensitet të ulët dhe po mbahet nën kontroll nga Shërbimi Pyjor dhe MZSH-ja.

Ndërkohë, në Gurë-Lurë zjarri është shuar dhe zona vijon të monitorohet. Në Qafë Helmes, vatra është izoluar dhe operacionet vijojnë me forcat lokale.

Strukturat e Mbrojtjes Civile vijojnë koordinimin e ndërhyrjeve në të gjitha zonat e prekura, me prioritet mbrojtjen e jetës dhe banesave, si dhe izolimin e plotë të vatrave aktive.