TIRANË – Kualifikimi i Dinamos në play-off-in e Conference League është shoqëruar me një festë të pazakontë në dhomën e zhveshjes, pamjet e së cilës kanë kaluar kufijtë e Shqipërisë dhe janë publikuar nga media të ndryshme europiane.

Pas fitores 4-0 ndaj Audës së Letonisë, presidenti i Dinamos, Ardian Bardhi, është shfaqur në dhomën e zhveshjes me një qese të mbushur me para. Në pamjet e publikuara, Bardhi i hedh paratë në dysheme përpara futbollistëve, duke shkaktuar entuziazëm te skuadra.

Sipas raportimeve, premio e akorduar për ekipin nga presidenti i klubit është 90 mijë euro.

Videoja e festës është bërë virale dhe ka tërhequr vëmendjen e mediave sportive jashtë vendit. Në Itali, “Il Messaggero” e ka përshkruar skenën si “shi parash në dhomën e zhveshjes”, ndërsa spanjollja “Marca” e ka cilësuar si një skenë të pazakontë, ku presidenti i klubit hyn në dhomën e zhveshjes dhe u hedh lojtarëve një qese me para.

Edhe media të tjera europiane, përfshirë “El Correo”, “Index.hr”, “Jutarnji list”, “Večernji list”, “SportKlub”, “Digi Sport”, “AS.ro” dhe “Sportsport.ba”, kanë publikuar pamjet dhe historinë e festës së skuadrës shqiptare.

Jehona e videos ka mbërritur edhe në Amerikën Latine, ku “Record México” i ka kushtuar vëmendje skenës së pazakontë pas kualifikimit.

Por përtej festës, Dinamo ka tashmë një tjetër objektiv të rëndësishëm europian. Sipas raportimeve, presidenti Ardian Bardhi u ka premtuar futbollistëve një premio prej 500 mijë eurosh nëse skuadra arrin të eliminojë Pafos dhe të sigurojë kualifikimin në fazën e ligës së Conference League.

Kështu, një moment feste pas fitores 4-0 është kthyer në një nga pamjet më të komentuara të Dinamos, duke i dhënë klubit kryeqytetas vëmendje edhe përtej rezultateve në fushën e lojës.