Mediat portugeze kanë pasqyruar ngjarjen e rëndë të regjistruar në Ksamil, ku një 20-vjeçar portugez, i identifikuar me inicialet L.V., u theksua se u vra pas një konflikti në një lokal nate.

Sipas raportimeve të referuara nga mediat e huaja dhe ato vendase, i riu dyshohet se është sulmuar me thikë brenda ambienteve të lokalit "Principote" rreth orës 2:30 të mëngjesit dhe më pas trupi i tij është transportuar dhe lënë në një shezlong plazhi, ku u gjet rreth tre orë më vonë nga autoritetet. Konflikti dyshohet se ka nisur për motive xhelozie apo çështje që lidhen me një grua.

Për këtë ngjarje tragjike, Policia e Shtetit ka arrestuar 11 persona, ndërsa dy të tjerë janë shpallur në kërkim. Autori i dyshuar i goditjes me thikë në shpinë dhe gjoks është identifikuar si Sokrat Vata, 29 vjeç, i cili u kap duke u arratisur i fshehur në bagazhin e një makine të drejtuar nga dy shtetas turq. Vata ka precedentë penalë në Mbretërinë e Bashkuar për trafik droge, armëmbajtje dhe drejtim të rrezikshëm, ndërsa në lokal dyshohet se punonte si punonjës sigurie.

Në mesin e të arrestuarve për këtë ngjarje janë edhe një punonjës policie dhe një efektiv i policisë bashkiake të Gjirokastrës, të cilët shërbenin si staf sigurie në lokal dhe nuk ndërhynë për të parandaluar krimin. Gjithashtu, pronari i lokalit, Bekim Bulica – i cili ka precedentë të mëparshëm për sulm ndaj një efektivit – bashkë me katër punonjës të tjerë, janë vënë në pranga ose merren në pyetje për mosraportim të krimit dhe largim nga vendi i ngjarjes pa njoftuar autoritetet.

Ndërkohë, policia vijon kërkimet për dy persona të tjerë, përfshirë një 36-vjeçar me iniciale D.H., i cili dyshohet si bashkëautor i vrasjes.