Një 30-vjeçar shqiptar me banim në Bruksel, i identifikuar si Emanuel D., rrezikon një dënim prej 42 muajsh burg efektiv pasi u identifikua si pjesë e një bande hajdutësh që kryeu një seri vjedhjesh në banesa në Flandrën Perëndimore.

Sipas prokurorisë belge, banda e përfshirë në të ashtuquajturat "vjedhje shëtitëse" kishte në shënjestër kryesisht paratë cash, bizhuteritë, unazat e martesës dhe orët luksoze. Të dyshuarit akuzohen se kanë kryer nëntë vjedhje dhe kanë tentuar tetë të tjera në zona si Jabbeke, Ichtegem, Oostkamp dhe Zedelgem gjatë periudhës 1-21 nëntor 2025.

Hetuesit arritën të lidhin shqiptarin me krimet përmes kamerave të sigurisë ANPR, analizës së të dhënave të antenave telefonike dhe vendndodhjes së pajisjes së tij, e cila rezultoi aktive pranë vendit të ngjarjeve. Provë kyçe u bënë edhe kërkimet e zbuluara në telefonin e tij, ku ai kishte kërkuar informacione për çmimet e arit, një orë të markës Breitling dhe madje adresën e njërës prej banesave të grabitura.

Prokuroria ka kërkuar gjithashtu një gjobë dhe konfiskimin e automjetit tip Peugeot të përdorur gjatë krimeve. Ndërkohë, bashkëpunëtori i tij i dyshuar ndodhet aktualisht i burgosur në Austri për një çështje tjetër dhe pritet të përballet me drejtësinë në Bruges në një moment të dytë.

Nga ana e tij, avokati mbrojtës kërkoi mëshirë dhe një dënim me kusht ose nën mbikëqyrje elektronike, me pretendimin se klienti i tij po respekton rregullat aktuale dhe duhet të kujdeset për djalin e tij dyvjeçar. Gjykata pritet të shpallë vendimin përfundimtar më 27 gusht.