Dy të rinjtë që mbetën të plagosur rëndë në aksidentin tragjik të regjistruar gjatë natës në Manzë të Durrësit po vijojnë të marrin trajtim mjekësor të specializuar në Spitalin e Traumës në Tiranë.

Sipas stafeve mjekësore, 16-vjeçari ndodhet në gjendje të rëndë shëndetësore dhe nën kujdesin intensiv të mjekëve, ndërsa i lënduari i dytë paraqitet në gjendje më stabël, por ende nën vëzhgim të rreptë mjekësor.

Aksidenti i rëndë ndodhi në orët e para të mëngjesit, pasi automjeti tip BMW me të cilin udhëtonin pesë persona doli nga rruga dhe u përplas me bordurat anësore të betonit. Përplasja rezultoi fatale për çiftin e sapomartuar Kleo Vrioni dhe Sara Brugentelli, si dhe për 15-vjeçarin Alvi Muhaxhiri, të cilët ndërruan jetë në vendngjarje.

Grupi hetimor ka zbardhur se mbrëmjen e kaluar, pesë të rinjtë kishin qenë duke u argëtuar në një lokal nate në zonën e Maminasit, ndërsa tragjedia ka ndodhur teksa po ktheheshin në drejtim të banesës së lor në Katund të Ri.