Kolumnë nga Arwa Mahdawi – The Guardian/ përktheu noa.al

A ka parë njeri kohët e fundit një grua 56-vjeçare? E gjatë, me flokë biondë në nuancë kanelle, e apasionuar pas kapelave elegante dhe që, për të cituar Vogue, herë pas here vishet si një “magjistare freelance”. Njihet me emrin “Melania Trump” ose “zonja e parë” dhe duket se është zhdukur sërish. Sipas një analize të Daily Beast, Melania ka bërë vetëm 38 dalje publike këtë vit – e fundit prej tyre ishte në finalen e Kupës së Botës. Prej rreth një muaji ajo nuk është parë askund.

Për të qenë të drejtë, kjo nuk është diçka jashtë karakterit të saj. Gjatë qëndrimit të saj të parë në Shtëpinë e Bardhë, mungesat e shpeshta të zonjës së parë nxitën teori të ndryshme konspirative, përfshirë edhe një sipas së cilës ajo kishte një sozi. Por duket se Melania po mban një profil edhe më të ulët gjatë Trump 2.0. NBC raportoi të hënën se ajo ka marrë pjesë në rreth gjysmën e eventeve publike që kishte zhvilluar në të njëjtën periudhë gjatë mandatit të parë të Trump. Një këshilltar i lartë i tha medias se ajo “u jep përparësi rezultateve ndaj paraqitjeve”. Nuk jam fort e bindur për këtë. Dalja e saj publike më e profilit të lartë këtë vit ishte kur mbajti një konferencë të papritur për shtyp, duke u thënë të gjithëve të mos spekulonin për marrëdhënien e saj me Jeffrey Epstein. Kjo pati rezultatin e parashikueshëm që të gjithë të fillonin të spekulonin për marrëdhënien e saj me shkelësin seksual tashmë të ndjerë.

Zonja e parë mund të mos ketë shumë dëshirë për punë, por sigurisht që nuk është e turpshme përpara kamerave. Melania ishte protagoniste në një dokumentar me emrin e saj, financuar nga Amazon, i cili u shfaq në kinema në fillim të vitit. Ted Hope, një ish-punonjës i Amazon, i tha New York Times se 35 milionë dollarët për promovimin dhe 40 milionë dollarët për të drejtat nënkuptonin se ai duhej “të ishte dokumentari më i shtrenjtë i bërë ndonjëherë që nuk përfshinte licencim muzikor”. Ai shtoi: “Si mund të mos barazohet kjo me përpjekjen për të fituar favore apo me një ryshfet të drejtpërdrejtë?” Jeff Bezos do t’i mohonte me forcë akuza të tilla të shëmtuara. Ai ka thënë se, edhe pse nuk kishte asnjë lidhje me projektin, ai ishte një “vendim i mirë biznesi”.

Vendim i mirë biznesi apo jo, filmi për Melanian nuk u prit mirë – recensenti i Guardian i dha zero yje. Megjithatë, duket se më shumë përmbajtje intriguese për zonjën e parë është rrugës. Një seri dokumentare shoqëruese e filmit do të vijë në Prime Video këtë vjeshtë. Në fillim të këtij muaji, një nga këshilltarët e Melanias i tha rrjetit konservator Real America’s Voice se kjo seri do të “hyjë pak më thellë në karrierën e saj, si edhe në filantropinë e saj”. Nëse skemat e saj për të fituar para janë ndonjë tregues, teoria e Melanias për filantropinë duket se është se bamirësia fillon nga shtëpia.

Arwa Mahdawi është kolumniste e Guardian