Ka nisur procesi gjyqësor ndaj Duane “Keefe D” Davis, i akuzuar për përfshirjen në vrasjen e reperit legjendar Tupac Shakur. Në ditën e parë të dëshmive, një ish-polic dhe një dëshmitare okulare sollën detaje nga minutat e fundit të jetës së artistit.

Në sallën e gjyqit ishte e pranishme edhe Sekyiwa Shakur, motra e Tupac, e cila ndoqi seancën.

Davis, 63 vjeç, është personi i akuzuar në këtë çështje për vrasjen e Tupac Shakur, i cili u qëllua në Las Vegas në vitin 1996 dhe vdiq në moshën 25-vjeçare.

Ish-polici: Tupac nuk tregoi emrin e autorit

Dëshmitari i parë ishte ish-polici Garry Dale, një nga personat që e pa Tupac gjatë orëve të fundit të jetës së tij.

Rreth 10 minuta përpara të shtënave, Dale kishte ndaluar BMW-në e zezë ku udhëtonte Tupac së bashku me producentin dhe mikun e tij, Suge Knight, pasi automjeti nuk kishte targë të pasme.

Pas atentatit, Dale u përball sërish me automjetin. Ai tregoi se Tupac ishte nxjerrë nga makina i plagosur rëndë, ndërsa Knight u kërkoi policëve të kujdeseshin për reperin.

Dale hipi në ambulancë me Tupac dhe gjatë transportit drejt spitalit tentoi të mësonte prej tij se kush e kishte qëlluar.

Sipas dëshmisë së ish-policit, Tupac ishte ende në gjendje të fliste, por nuk pranoi të identifikonte autorin.

Kur Dale e pyeti për sulmuesin, reperi iu përgjigj:

“Jo, ne do të merremi me këtë.”

Sipas dëshmitarit, pas kësaj Tupac nuk pranoi të jepte më informacion.

Zinxhiri prej ari u zhduk pas të shtënave

Dale përmendi edhe një tjetër detaj që mund të jetë me interes për hetimin.

Gjatë kontrollit të parë të BMW-së, para atentatit, ai kishte vënë re një zinxhir të madh prej ari në qafën e Tupac. Pas të shtënave, zinxhiri nuk ishte më në qafën e reperit, të paktën jo kur ai ndodhej në ambulancë.

Dëshmitarja: “Shpërtheu ferri”

Në gjykatë dëshmoi edhe Ingrid Stokes, e cila ndodhej pranë vendit të ngjarjes.

Ajo po udhëtonte me tre miq drejt Club 662, ku po shkonin edhe Tupac dhe Suge Knight. Automjeti i tyre ishte vetëm disa makina pas BMW-së së reperit kur ndodhi atentati.

Stokes tha se në momentin e të shtënave “shpërtheu ferri”.

Ajo kishte dashur fillimisht të ndihmonte hetuesit, por deklaroi se pasi policia e trajtoi atë dhe miqtë e saj pothuajse si të dyshuar, ata vendosën të mos flisnin më.

Gjatë seancës, një prej anëtarëve të jurisë e pyeti Stokes nëse kishte mundur të përcaktonte drejtimin nga i cili erdhën të shtënat.

Ajo u përgjigj se në një situatë të tillë nuk kishte mundur ta kuptonte, pasi në ato momente fokusi ishte te ajo që po ndodhte.

Procesi ndaj Duane “Keefe D” Davis pritet të sjellë dëshmi të tjera mbi atentatin që i mori jetën Tupac Shakur në Las Vegas në shtator 1996.