Një 30-vjeçar ka mbetur i plagosur rëndë mbrëmjen e sotme në Durrës, në rrethana që ende nuk janë bërë të plota të qarta. I riu është transportuar me urgjencë në Spitalin Rajonal të Durrësit, ku i është nënshtruar ndërhyrjes kirurgjikale.

Sipas burimeve të cituara nga mediat, 30-vjeçari është dërguar në spital me një automjet privat, pasi dyshohet se është plagosur me një kaçavidë në pjesën e kraharorit.

Për shkak të dëmtimeve të marra, i riu ndodhet në gjendje të rëndë shëndetësore dhe po merr trajtim mjekësor.

Ndërkohë, Policia ka nisur veprimet hetimore për zbardhjen e ngjarjes. Sipas raportimeve paraprake, autori i dyshuar është identifikuar përmes pamjeve të kamerave të sigurisë dhe është kapur nga forcat e rendit.

Shërbimet e Policisë ndodhen pranë ambienteve të spitalit, ndërsa po kryhen verifikimet për të përcaktuar rrethanat, vendin dhe motivin e konfliktit që çoi në plagosjen e 30-vjeçarit.

Deri në këto momente, shkaqet e ngjarjes mbeten të paqarta, ndërsa hetimet vijojnë për dokumentimin e plotë të saj.