Ndarja e papritur nga jeta e ish-kryetarit të Gjykatës së Vlorës, Skënder Halucit, ka sjellë reagime të shumta. Mes tyre është edhe një dedikim i fortë emocional nga kushërira e tij, e cila e përshkruan atë si një njeri të afërt dhe të rëndësishëm për familjen, ndërsa ngre akuza të forta për periudhën e tij në sistemin e drejtësisë.

Në mesazhin e saj, kushërira e Halucit shprehet se ai ishte për të “jo vetëm kushëri, por vëlla, shok e mik”, duke kujtuar figurën e tij njerëzore dhe karakterin që, sipas saj, e ruajti pavarësisht vështirësive.

“Jeta e solli atë që as nuk e imagjinoja e as po e besoj dot: të derdhja lot vajtimi e fjalë trishtimi për ty. Kjo, jo vetëm për faktin se askush nuk e priste, por edhe për atë që ishe… një legjendë me shpirt njeriu”, shkruan ajo.

Akuzat për largimin nga drejtësia

Në një pjesë tjetër të dedikimit, ajo ndalet te karriera e Halucit dhe përballjet e tij profesionale, duke shprehur kritika të forta ndaj personave që, sipas saj, ndikuan në largimin e tij nga sistemi i drejtësisë.

“Janë ata që të dënuan, ata që të vetmuan, ata që të larguan nga sistemi i drejtësisë, ata që të braktisën kur duhej të të qëndronin pranë dhe ata që të ndërruan me një kodosh-shërbëtor të oligarkisë”, shkruan ajo.

Këto janë deklarime të familjares së Halucit dhe nuk shoqërohen në mesazhin e publikuar me prova apo vendime të cituara që të vërtetojnë akuzat e ngritura prej saj.

Më tej, duke përdorur një gjuhë të fortë emocionale, ajo shkruan se, sipas saj, Haluci është përballur me një padrejtësi që e ka dëmtuar rëndë.

“E pra, nëse do të instalohej Kanuni në plotninë e vet, gjakun borxh për ty na e kanë pikërisht këta mjeranë që të vranë pa gjyq, duke e dobësuar gjer në pushim një zemër fisnike.”

“Nuk mund t’i heqësh nga kujtesa”

Pavarësisht toneve të forta të mesazhit, në pjesën tjetër kushërira e tij përqendrohet te kujtimi që Haluci ka lënë te njerëzit që e kanë njohur.

“Ka njerëz që mund t’i heqësh nga një detyrë, nga një sistem, nga një zyrë apo edhe nga kjo botë, por nuk mund t’i heqësh nga kujtesa e njerëzve që i kanë njohur dhe i kanë dashur”, shkruan ajo.

Në fund të dedikimit, ajo zgjedh të mos përdorë fjalën “lamtumirë”, por e mbyll mesazhin me një shprehje besimi dhe shprese:

“A Dieu, Skënder i dashur. U pafshim pranë Zotit.”