Të tjera detaje kanë dalë në dritë nga ngjarja e rëndë që tronditi Ksamilin mëngjesin e së martës, ku një turist portugez, 20 vjeç, humbi jetën pasi u godit me thikë. Për ngjarjen është arrestuar 29-vjeçari Sokrat Vata.

Sipas burimeve, Vata ka zgjedhur të mos japë deklarime para grupit hetimor, duke mos bërë asnjë dëshmi lidhur me rrethanat e ngjarjes.

Në kuadër të hetimeve janë marrë në pyetje edhe dy shtetas turq, të cilët u kapën së bashku me 29-vjeçarin, teksa dyshohet se po e largonin nga vendi i ngjarjes.

Në prani të përkthyesve, ata kanë treguar para hetuesve marrëdhënien që kishin me Vatën dhe arsyen pse e morën në automjet pas konfliktit. Sipas dëshmive të tyre, dy shtetasit turq ishin klientë të rregullt të lokalit “Principotes” dhe kishin krijuar një raport shoqëror me 29-vjeçarin.

Ata kanë deklaruar gjithashtu se i paguanin Vatës shërbime sigurie, duke e angazhuar si truprojë dhe shoqërues personal.

Të dy shtetasit turq kanë mohuar çdo përfshirje në vrasje, duke pretenduar se e morën Vatën në automjet vetëm për shkak të marrëdhënies shoqërore që kishin me të.

“Ishim miq dhe e shoqëruam për shkak të miqësisë”, mësohet të kenë deklaruar ata para hetuesve.

Ndërkohë, grupi hetimor ka marrë në pyetje edhe miqtë e viktimës, të cilët kanë dhënë versionin e tyre mbi mënyrën se si nisi konflikti dhe momentet që i paraprinë goditjes fatale.

Sipas dëshmive të tyre, konflikti dyshohet se ka nisur brenda ambienteve të lokalit pas një incidenti të lidhur me ngacmimin e një vajze. Situata më pas është përshkallëzuar dhe në përleshje janë përfshirë disa persona.

Në përpjekje për të neutralizuar situatën kanë ndërhyrë edhe punonjësit e sigurisë. Në këtë moment, 20-vjeçari portugez dyshohet se është futur mes personave të përfshirë në konflikt, me qëllim që t’i ndante dhe të qetësonte situatën.

Por ndërhyrja e tij përfundoi në mënyrë tragjike. I riu u godit me thikë dhe, si pasojë e plagëve të marra, humbi jetën.

“Sherri nisi për ngacmimin e një vajze. Në konflikt u përfshinë disa persona. Viktima u fut për të shuar konfliktin”, mësohet të kenë deklaruar miqtë e viktimës.

Hetimet vijojnë për të zbardhur dinamikën e plotë të konfliktit, rolin e secilit prej personave të përfshirë dhe rrethanat që çuan në vrasjen e turistit portugez.