SHBA – Një 37-vjeçar që jeton aktualisht në Shqipëri është paditur nga drejtësia amerikane, nën akuzën se për më shumë se një vit ka dërguar mesazhe kërcënuese dhe me përmbajtje të dhunshme ndaj disa personave në New Jersey dhe Pennsylvania.

Sipas Prokurorit të SHBA-së, Robert Frazer, Jarvis Shabazz është akuzuar nga një juri e madhe për tetë vepra penale të transmetimit të kërcënimeve ndërshtetërore dhe dy akuza për përndjekje kibernetike.

Sipas aktakuzës, më 10 tetor 2022, Shabazz i ka dërguar një prej viktimave një mesazh zanor, ku dyshohet se e kërcënonte me vdekje dhe përdorte përshkrime të dhunshme.

Një javë më vonë, ai dyshohet se ka dërguar një tjetër mesazh kërcënues, duke i thënë viktimës se do të vdiste nga duart e tij dhe duke kërcënuar edhe familjarët e saj.

Autoritetet amerikane pretendojnë se kërcënimet kanë vijuar për rreth 15 muaj, ndërsa 37-vjeçari dyshohet se ndryshonte vazhdimisht numrat e telefonit pasi viktimat i bllokonin.

Sipas prokurorit amerikan, mesazhet përmbanin referenca të dhunshme, fetare, racore dhe gjuhë fyese.

Shabazz, i cili raportohet se ka lidhje me New Jersey, Georgia, Malajzinë, Marokun dhe Shqipërinë, përballet me akuza të shumta në SHBA.

Nëse shpallet fajtor për të gjitha akuzat, ai rrezikon deri në 50 vite burgim, ndërsa gjobat mund të arrijnë deri në 250 mijë dollarë për secilën akuzë, sipas autoriteteve amerikane.

Çështja tashmë ndodhet në duart e drejtësisë amerikane, ndërsa 37-vjeçari konsiderohet i akuzuar dhe jo i dënuar përfundimisht.