Detaje të reja janë bërë publike lidhur me arrestimin e Sokrat Vatës, 29-vjeçarit të dyshuar për vrasjen e 20-vjeçarit portugez në Ksamil.

Sipas informacioneve të raportuara, Vata u arrestua në Levan të Fierit, teksa ishte fshehur në bagazhin e një automjeti. Në momentin e ndalimit, në automjet ndodheshin edhe persona të tjerë, mes tyre një shtetas turk, ndërsa drejtuesja e mjetit ishte një shtetase e huaj.

Sipas të njëjtave të dhëna, Vata, përveç punës si roje plazhi në “Principotes”, dyshohet se kryente edhe detyrën e badigardit të hotelit. Rrethanat e udhëtimit dhe prania e shtetasve të huaj në automjet janë pjesë e hetimit të autoriteteve.

29-vjeçari ishte shpallur në kërkim pas vrasjes së turistit, i cili u godit me thikë në Ksamil pas një konflikti.

Policia dhe grupi hetimor vijojnë punën për zbardhjen e plotë të dinamikës së ngjarjes, si dhe për të përcaktuar rrethanat e largimit të të dyshuarit nga vendi i krimit.

Levan, Fier/Kapet dhe vihet në pranga, pas 5 orësh nga vrasja, autori i dyshuar i vrasjes së 20-vjeçarit, në Ksamil

Kapja e tij u bë si rezultat i koordinimit dhe bashkëpunimit të shërbimeve të Policisë të Drejtorisë Vendore të Policisë Vlorë dhe Drejtorisë Vendore të Policisë Fier.

Autori i dyshuar u kap nga shërbimet operacionale të Drejtorisë Vendore të Policisë Vlorë, në bashkëpunim me shërbimet e forcës “Shqiponja” të DVP Fier, në pikën e përbashkët të kontrollit të ngritur për kapjen e tij, në aksin rrugor “Levan-Fier”.

Autori i dyshuar, shtetasi S. V., 29 vjeç, ishte fshehur në bagazhin e një automjeti që drejtohej nga një 31-vjeçare, shtetase turke, ndërsa në automjet udhëtonte si pasagjer edhe një 38-vjeçar, shtetas turk.

Autori i dyshuar dhe dy shtetasit turq u shoqëruan në DVP Vlorë, për veprime të mëtejshme procedurale.

Ndërkohë, grupi hetimor, në drejtimin e Prokurorisë, po vijon veprimet për dokumentimin e plotë të rrethanave të ngjarjes.

Përditësim:

Në lidhje me ngjarjen e ndodhur mëngjesin e sotëm në Ksamil, ku humbi jetën një shtetas i huaj, policia e Vlorës njoftoi para pak se të dhënat e mëparshme i kishte të pasakta duke theksuar se viktima ishte shtetas portugez dhe jo francez.

"Bazuar në të dhënat paraprake të disponueshme në momentet e para të ngjarjes, viktima u identifikua fillimisht si shtetas francez, me inicialet M. M. Në vijim të veprimeve hetimore dhe pas gjetjes së dokumentit të identifikimit, u konfirmua se ishte shtetas portugez, me inicialet L. V., i datëlindjes 27.09.2005".

Vrasja në Ksamil/ Në automjetin ku u arrestua Sokrat Vata ishte një femër turke dhe një i tretëhttps://t.co/MavL5zb63G pic.twitter.com/vIlvUXv6CF

— NOA (@noanews) August 18, 2026