Detaje të reja janë zbardhur nga incidenti i rëndë i regjistruar mbrëmjen e së hënës në Porto Palermo, ku katër persona mbetën të plagosur pas një zjarri që përfshiu një gomone gjatë punimeve për riparimin e motorit.

Një prej të plagosurve, Xhemal Ismaili, ka pësuar djegie në rreth 50% të trupit dhe është transportuar me autoambulancë drejt Tiranës për të marrë trajtim më të specializuar.

Teksa po largohej nga zona e incidentit, Ismaili ka treguar për mediat momentet e para të shpërthimit. Sipas dëshmisë së tij, në momentin e ngjarjes ai ndodhej pranë gomones së bashku me persona të tjerë, ndërsa gjatë punimeve kishte rrjedhur benzinë nga motori.

Sipas të plagosurit, karburanti u përfshi papritur nga flakët, duke shkaktuar një shpërthim të menjëhershëm.

Flakët përfshinë personat që ndodheshin pranë gomones, duke shkaktuar djegie në pjesë të ndryshme të trupit.

Ismaili dërgohet në Tiranë

Për shkak të djegieve të rënda, Xhemal Ismaili është transportuar me autoambulancë drejt Tiranës, ku pritet të marrë një trajtim më të specializuar.

Tre personat e tjerë të plagosur janë gjithashtu dërguar për ndihmë mjekësore pas incidentit.

Ngjarja ndodhi gjatë riparimit të motorit të skafit në zonën e Porto Palermos. Dyshimet paraprake janë se rrjedhja e benzinës dhe kontakti i saj me një burim flake shkaktuan zjarrin.

Ndërkohë, grupi hetimor vijon verifikimet për të përcaktuar me saktësi rrethanat e incidentit dhe shkakun e shpërthimit.