DURRËS — Policia Bashkiake e Durrësit ka ndërmarrë një aksion të gjerë në terren për zbatimin e rregullave dhe garantimin e sigurisë së qytetarëve e pushuesve, duke ushtruar kontrolle të rrepta ndaj qarkullimit të monopatinave dhe mjeteve të tjera elektrike në shëtitore dhe sheshe publike.

Gjatë kontrollove të kryera përgjatë Shëtitores “Taulantia”, strukturat e Policisë Bashkiake kanë bërë të mundur sekuestrimin e disa monopatinave dhe vendosjen e masave administrative (gjoba) për drejtuesit që kanë shkelur rregullat.

Zonat ku ndalohet rreptësisht qarkullimi i monopatinave

Sipas njoftimit zyrtar, ndalimi i qarkullimit të mjeteve elektrike dhe monopatinave zbatohet në mënyrë të prerë në zonat me fluks të lartë këmbësorësh, konkretisht në:

Shëtitoren e Plazhit

Shëtitoren “Taulantia”

Sheshin “Liria”

Shëtitoren tek Shkëmbi i Kavajës

Vala Park

Sheshin “Moikom Zeqo” (në hyrje të qytetit të Durrësit)

Shëtitoren në bregdet, në zonën e Ishmit

Autoritetet vendore kanë bërë me dije se kontrollet do të jenë të vazhdueshme dhe do të shtrihen në të gjitha hapësirat publike të përcaktuara, me qëllim parandalimin e aksidenteve dhe garantimin e një mjedisi të sigurt për fëmijët, të moshuarit dhe vizitorët e shumtë gjatë kësaj periudhe sezoni. Policia Bashkiake u bën thirrje qytetarëve dhe vizitorëve për mirëkuptim dhe bashkëpunim në zbatimin e rregullave.