DURRËS — Një aksident i rëndë trafiku i regjistruar paraditen e kësaj të hëne në zonën e Plazhit në Durrës ka shkaktuar humbjen e jetës së një 66-vjeçari.

Sipas njoftimit zyrtar të Policisë, rreth orës 10:30, në lagjen nr. 13, një automjet tip taksi i drejtuar nga 26-vjeçari me iniciale Aldi Talelli. ka përplasur këmbësorin, shtetasin Fejzi Dine, 66 vjeç, ndërsa ky i fundit po lëvizte në zonë.

I moshuari është transportuar menjëherë me urgjencë drejt spitalit për të marrë ndihmën e parë mjekësore, por fatkeqësisht, për shkak të plagëve të rënda të marra nga përplasja, nuk ka mundur t’u mbijetojë lëndimeve dhe ka ndërruar jetë në ambientet spitalore.

Drejtuesi i automjetit, 26-vjeçari Aldi Talelli, është shoqëruar menjëherë në ambientet e Komisariatit të Policisë dhe ndaj tij po kryhen veprimet e mëtejshme procedurale për arrestimin në flagrancë.

Grupi hetimor, nën drejtimin e Prokurorisë, vijon punën në terren për zbardhjen e plotë të shkaqeve dhe rrethanave të ngjarjes tragjike.

Durrës/ Informacion shtesë

Në vijim të informacionit paraprak të dhënë pak minuta më parë, ju njoftojmë se shtetasi F. D., 66 vjeç, i cili u përplas nga një automjet në lagjen 13, Durrës, si pasojë e plagëve të marra, ka ndërruar jetë në spital.