TIRANË — Kryetari i Partisë Demokratike, Sali Berisha, ka lëshuar akuza të ashpra ndaj qeverisë dhe strukturave të Policisë së Shtetit, duke deklaruar se vendi është lënë nën kontrollin e krimit dhe se situata e sigurisë publike ka degraduar rëndë. Gjatë fjalës së tij, Berisha përmendi disa ngjarje të fundit kriminale në Sarandë, Elbasan dhe Krujë, ndërsa u ndal te rasti i arrestimit të Ylli Zallës.

Lideri i opozitës vuri në dukje se ngjarjet e fundit dëshmojnë dështimin total të autoriteteve në garantimin e rendit dhe qetësisë publike.

Berisha: Krimi ka marrë kontrollin, nga Saranda te Elbasani Duke renditur disa nga ngjarjet e bujshme të ditëve të fundit, Berisha u shpreh se institucionet ligjzbatuese ose janë të pafuqishme, ose të përfshira në skandale:

Në Sarandë: Berisha denoncoi një ngjarje ku, sipas tij, persona me përgjegjësi publike dhe funksione për zbatimin e ligjit janë përfshirë në sjellje të papranueshme në një ambient publik, duke krijuar konflikte me qytetarët dhe badigardët e lokalit.

Në Elbasan: Ai iu referua një krimi të regjistruar në sy të kamerave dhe qytetarëve, ku autorët kanë vepruar në mes të ditës pa pasur asnjë lloj frike apo pengese nga strukturat e rendit.

Akuzat për rastin e Ylli Zallës: "Lamallari mashtroi, u dorëzua vetë"

Një pjesë të konsiderueshme të deklaratës së tij, kryetari i PD-së ia kushtoi arrestimit të 49-vjeçarit Ylli Zalla në Fushë-Krujë, për të cilin Ministria e Brendshme njoftoi se u kap gjatë një operacioni të përbashkët të forcave RENEA dhe "Operacionales".

Sipas Berishës, versioni zyrtar i policisë është një mashtrim publik:

"Një i shumëkërkuar, Ylli Zalla, i vendosin tritol në banesë dhe bën konferencë shtypi para shtëpisë… Lamallari mashtron qytetarët, thotë se e arrestuan, ndërkohë Zalla u dorëzua vetë. Se si mund të ketë dorëzim tjetër se sa të dalë në konferencë shtypi, vetëm mendja bosh e Lamallarit mund ta cilësojë arrestim," u shpreh Berisha, duke hedhur dyshime mbi dinamikën e ngjarjeve dhe mënyrën se a po menaxhohet situata e kriminalitetit në vend.