PODUJEVË — Janë bërë të ditur identitetet e dy vëllezërve që humbën jetën tragjikisht në aksidentin e rëndë të trafikut të regjistruar mbrëmjen e kaluar në fshatin Surkish të Podujevës. Viktimat janë Hajdar dhe Bujar Matarova.

Sipas informacioneve paraprake dhe raportit zyrtar të Policisë së Kosovës, aksidenti u shkaktua kur drejtuesi i një automjeti me targa të huaja, për shkak të pakujdesisë, ka goditur një veturë tjetër që drejtohej nga një shtetas kosovar.

Si pasojë e përplasjes së fortë, drejtuesi dhe pasagjeri që ndodheshin në makinën me targa të huaj – dy vëllezërit Matarova – kanë ndërruar jetë në vend.

Ndërkohë, drejtuesi i automjetit tjetër ka pësuar lëndime dhe pas marrjes së ndihmës mjekësore, me vendim të prokurorit të shtetit, është ndaluar dhe dërguar në mbajtje.

Trupat e pajetë të dy viktimave janë dërguar në Institutin e Mjekësisë Ligjore (IML) për kryerjen e obduksionit, ndërsa autoritetet kompetente vijojnë hetimet për zbardhjen e plotë të rrethanave të ngjarjes.