DIBËR — Qarku i Dibrës po përballet me një situatë të rënduar nga vatrat aktive të zjarrit, ku situata më kritike paraqitet në Parkun Kombëtar të Lurës, ndërsa flakët rrezikojnë të përhapen drejt territorit të Matit.

Sipas autoriteteve vendore, aktualisht në të gjithë qarkun janë aktive tri vatra kryesore, ku po punohet me intensitet për vënien e tyre nën kontroll.

Parku Kombëtar i Lurës në shënjestër të flakëve

Vatra më e madhe dhe më shqetësuese vazhdon të jetë ajo në Parkun Kombëtar të Lurës. Gjatë natës, zjarri është zhvilluar në tri drejtime kryesore: nga Gura e Lurës, Fushë-Lura dhe mbi fshatin Borie Lurë.

Megjithëse situata u paraqit më e qetë gjatë orëve të para të mëngjesit, një nga perimetrat e flakëve ndodhet pranë zonës së banuar, duke rritur shqetësimin për sigurinë e banorëve. Përballë kësaj situate, autoritetet kanë mobilizuar një forcë të madhe prej 180 personash, që përfshin strukturat e bashkisë, Zjarrfikësen (MZSH), shërbimet pyjore, Administratën e Zonave të Mbrojtura (ADZM) dhe vullnetarë, të mbështetur nga 15 efektivë të Policisë së Shtetit dhe 30 efektivë të Forcave të Armatosura. Në ndërhyrjen nga ajri pritet të përfshiohen edhe dy avionë specialë Air Tractor.

Vatrat në Qafë Helmës dhe Lufi

Qafë Helmës (Fushë-Bulqizë-Selishtë): Zjarri vazhdon të jetë aktiv në dy drejtime (nga Fushë-Bulqiza dhe fshati Kacni). Rritja e temperaturave rrezikon përhapjen e flakëve drejt pyjeve të larta me ah, ndërsa në terren po veprojnë forcat zjarrfikëse dhe vullnetarët për monitorim dhe ndërhyrje.

Fshati Lufi (Kufi me Mirditën dhe Matin): Flakët ndodhen rreth 200 metra larg pikës së bashkimit me Bruçin. Autoritetet paralajmërojnë se, nëse ritmi i përhapjes vazhdon, zjarri rrezikon të kalojë në territorin e Bashkisë Mat.

Me rritjen e temperaturave gjatë mesditës, situata mbetet nën vëzhgim të rreptë, ndërsa autoritetet presin që kushtet atmosferike të përcaktojnë ecurinë e mëtejshme të operacioneve të shuarjes.