KRUJË — Policia e Shtetit ka zyrtarizuar detajet e operacionit të koduar "Fundi i Arratisë", i cili çoi në arrestimin e 49-vjeçarit Ylli Zalla, një person i shpallur në kërkim dhe me rrezikshmëri të lartë shoqërore.

Operacioni u finalizua në një zonë të pyllëzuar në rrethinat e Krujës, si rezultat i një bashkëpunimi mes Forcave Speciale RENEA, Drejtorisë së Forcës së Posaçme Operacionale, strukturave operacionale të DVP Tiranë dhe Komisariatit të Policisë Krujë. Zalla, i cili kishte mundur t’i shpëtonte disa herë forcave rendore, u lokalizua dhe u vu në pranga ndërsa mbante me vete një armë zjarri kallashnikov dhe tre krehra me municion luftarak.

Sipas njoftimit zyrtar të Policisë, 49-vjeçari ka qenë në shënjestër të disa kontrolleve dhe operacioneve gjatë muajve të fundit:

14 nëntor 2025: Në banesën e tij u zbulua një arsenal armësh dhe lëndësh plasëse.

20 shkurt: Gjatë kontrolleve në zonën përreth banesës, shërbimet e policisë gjetën armë shtesë, lëndë plasëse, municion luftarak, lëndë narkotike cannabis sativa, si dhe uniforma policie.

23 qershor: Në një tjetër kontroll në banesë, u sekuestruan një armë zjarri pistoletë e bërë gati për qitje me fishekë në fole, një aparat celular, municion dhe një detektor frekuencash.

Materialet procedurale i kanë kaluar Prokurorisë për veprime të mëtejshme ligjore mbi akuzat e armëmbajtjes pa leje dhe veprimtarive të tjera të paligjshme.