ZPYRIH / AARGAU — Një operacion i gjerë i Policisë Kantonale të Zyrihut, i zhvilluar në bashkëpunim me autoritetet e Aargaut, ka çuar në shkatërrimin e një rrjeti të trafikut ndërkombëtar të lëndëve narkotike dhe zbulimin e një plantacioni masiv kanabisi në Zvicër.

Operacioni, i finalizuar pas një hetimi të gjatë, nisi kur policia e Zyrihut kontrolloi në autostradë automjetin e një shtetasi gjermani 36-vjeçar, i cili mbante me vete 30 mijë euro cash dhe katër telefona celularë të ndezur, pasi ishte vëzhguar duke u larguar nga një objekt biznesi në Spreitenbach të kantonit Aargau.

Të njëjtën ditë, forcat speciale zhvilluan një bastisje në ambientet e këtij objekt biznesi, ku u arrestuan dy persona: një 26-vjeçar nga Kosova dhe një 29-vjeçar nga Shqipëria.

Sekuestrot dhe zbulimet e bujshme

Brenda objektit u zbulua një plantacion i brendshëm (indoor) kanabisi me një sipërfaqe prej rreth 4.000 metrash katrorë. Sipas vendimit të Gjykatës Federale Penale të Zvicrës, në vendngjarje u gjetën dhe u sekuestruan:

23.918 bimë marihuane në faza të ndryshme zhvillimi;

1.106 kilogramë marihuanë e gatshme për shitje;

Dy armë zjarri dhe municion;

Makina profesionale për numërimin e parave dhe 6.420 franga zvicerane cash;

Pajisje teknike të sofistikuara për kultivimin, tharjen dhe përpunimin e lëndës narkotike, përfshirë mbetje të përdorura për prodhimin e polenit të rrëshirës.

Sipas drejtësisë zvicerane, objekti shërbente si një qendër e mirëfilltë industriale e prodhimit dhe trafikut të drogës në kuadër të një bande kriminale. Ndërkohë, administratorët kryesorë të kompanisë që shërbente si mbulesë për aktivitetin e paligjshëm janë shpallur në kërkim ndërkombëtar.

Përplasja juridike mes kantoneve

Çështja ka prodhuar gjithashtu një betejë juridike mbi kompetencat e hetimit. Prokuroria e Aargaut kishte kërkuar t’ia kalonte çështjen autoriteteve të Zyrihut, pasi ky i fundit kishte nisur hetimet e para. Megjithatë, Gjykata Federale Penale vendosi përfundimisht se jurisdiktimi i takon kantonit Aargau, pasi qendra e veprimeve kriminale dhe plantacioni i madh ndodheshin gjeografikisht në Spreitenbach.

Vendimi ka vënë në dukje edhe dështimin e mëparshëm të autoriteteve të Aargaut, të cilat në nëntor të vitit 2024 kishin marrë një informacion anonim mbi këtë aktivitet, por kishin vendosur të mos vepronin, duke e lënë çështjen pa hetuar deri në ndërhyrjen e bujshme të policisë së Zyrihut.