Haxhi Gojnovci, pjesë e KEK-ut që nga viti 1985, humbi jetën pas një aksidenti në zonën e ekskavatorit. Korporata ka shprehur ngushëllime për familjen dhe kolegët e tij

Një jetë i përkushtuar, humb jetën në krye të detyrës punonjësi i Korporatës Energjetike të Kosovës

Një punëtor i Korporatës Energjetike të Kosovës (KEK) ka humbur jetën pas një aksidenti të rëndë gjatë kryerjes së detyrës.

KEK-u njoftoi se ngjarja ka ndodhur mbrëmjen e së dielës, rreth orës 20:30. Viktima është Haxhi (Selatin) Gojnovci, i cili punonte si “Teknik i Xehtarisë” në kuadër të Divizionit të Prodhimit të Qymyrit.

Sipas njoftimit të Korporatës, Gojnovci pësoi aksident teksa ishte duke kryer detyrat e punës dhe po lëvizte në zonën e ekskavatorit. Pavarësisht ndërhyrjes për t’i ardhur në ndihmë, ai nuk arriti t’u mbijetonte plagëve.

Gojnovci ishte pjesë e KEK-ut që nga viti 1985 dhe gjatë më shumë se katër dekadave kishte dhënë kontributin e tij në Korporatë.

KEK-u u ka shprehur ngushëllime familjarëve, të afërmve, miqve dhe kolegëve të të ndjerit.

“Për kohën dhe vendin e varrimit, opinioni do të njoftohet sapo të përfundojnë procedurat përkatëse mjeko-ligjore dhe veprimet e tjera të nevojshme nga organet kompetente”, thuhet në njoftimin e KEK-ut.