Bota e filmit dhe televizionit amerikan është në zi. Aktorja Hayden Panettiere, e njohur për rolet e saj në serialet e suksesshme “Heroes” dhe “Nashville”, është ndarë nga jeta në moshën 36-vjeçare. Lajmi u konfirmua nga familja e saj përmes përfaqësueses së aktores, ndërsa është raportuar nga CBS News, AP dhe Reuters.

Në një deklaratë, babai i saj, Skip Panettiere, e përshkroi të bijën si një njeri që solli dashuri dhe gëzim jo vetëm për familjen dhe miqtë, por edhe për miliona njerëz që e ndoqën gjatë karrierës së saj në ekran. Familja ka kërkuar privatësi në këto momente të vështira.

Shkaqet e vdekjes nuk janë bërë publike. Përfaqësuesja e saj, Kasey Kitchen, ka bërë të ditur se rrethanat e ngjarjes janë ende nën hetim.

Panettiere e nisi karrierën në ekran që në fëmijëri, fillimisht në reklama dhe më pas në produksione televizive si “One Life to Live”. Fama ndërkombëtare erdhi me rolin e Claire Bennet në serialin “Heroes”, ku interpretonte një adoleshente me aftësi të jashtëzakonshme rigjeneruese.

Një tjetër rol që shënoi karrierën e saj ishte ai i Juliette Barnes në serialin muzikor “Nashville”. Interpretimi i saj i solli dy nominime për çmimet Golden Globe dhe e bëri Panettiere një nga figurat më të njohura të serialit.

Ajo u shfaq gjithashtu në filma të njohur si “Remember the Titans”, si dhe në sagën horror “Scream”. Karriera e saj shtrihej në më shumë se tri dekada, nga rolet si aktore fëmijë deri te produksionet e viteve të fundit.

Ndarja e papritur nga jeta e Hayden Panettiere ka sjellë reagime dhe homazhe në industrinë e argëtimit, ndërsa familjarët dhe admiruesit e saj presin më shumë informacion mbi rrethanat e vdekjes.