ITALI – Kupa e Italisë ka rezervuar një nga surprizat e para të mëdha të këtij edicioni. Lazio është eliminuar që në fazën e hershme të kompeticionit, pasi u mposht 0-2 në “Olimpico” nga Mantova, skuadër që militon në Serie B.

Skuadra e drejtuar nga Gattuso kontrolloi pjesën e parë, por nuk arriti të krijojë avantazh. Edhe pas pushimit, Lazio e pati të vështirë të gjente hapësira përballë një Mantove të organizuar mirë.

Në kërkim të ndryshimit të situatës, Frattesi u aktivizua në minutën e 70-të, por vetëm pesë minuta më vonë erdhi goditja e parë për vendasit.

Në minutën e 75-të, Bragantini përfitoi nga një hapësirë në mbrojtjen e Lazios dhe shërbeu për Ruoccon, i cili me një ndërhyrje rrëshqitëse dërgoi topin në rrjetë dhe i dha Mantovës avantazhin.

Lazio u hodh në sulm në minutat e fundit, ndërsa Gattuso aktivizoi edhe Ratkov e Noslin në përpjekje për të shmangur eliminimin. Por në vend të barazimit, erdhi edhe goli i dytë.

Në minutën e 96-të, Caiazzo përfitoi nga hapësirat e krijuara pas avancimit të të gjithë ekipit të Lazios dhe vulosi fitoren e Mantovës.

Me këtë rezultat, Mantova siguron kalimin në raundin tjetër, ndërsa Lazio bëhet skuadra e parë e Serie A që largohet nga Kupa e Italisë në këtë fazë.

Verona kalon me penallti

Në sfidën tjetër, Verona dhe Virtus Entella dhuruan një ndeshje dramatike, e cila u vendos nga ruleta e penalltive.

Entella kaloi e para në avantazh në minutën e 16-të, kur Guiu përfitoi nga një gabim i mbrojtjes së Veronës. Reagimi i vendasve ishte i shpejtë: Compagnon barazoi në minutën e 20-të, ndërsa Sarr përmbysi rezultatin duke çuar Veronën në 2-1.

Skuadra nga Liguria nuk u dorëzua dhe në minutën e 84-t riktheu baraspeshën me Franzonin, i cili realizoi nga pika e bardhë pas një prekjeje me dorë në zonë.

Në shtesë, Entella mendoi se kishte gjetur golin e fitores, por realizimi i Tirellit u anulua për pozicion jashtë loje.

Ndeshja shkoi në penallti, ku Verona u tregua më e saktë. Leali priti gjuajtjen e Coronës, ndërsa Tirelli goditi shtyllën. Kështu, Verona triumfoi 3-2 me penallti, pas barazimit 2-2 në kohën e rregullt.

Verona do të përballet me Cagliarin në raundin e ardhshëm, ndërsa në vazhdim të garës mbetet në lojë edhe mundësia e një përballjeje me Romën.