Fundjava e gushtit ka sjellë një fluks të lartë automjetesh në Shëngjin, duke shkaktuar trafik të rënduar dhe kolona të gjata në rrugët e daljes nga zona turistike.

Problematika më e madhe raportohet në aksin që lidh Ranën e Hedhun me rrugën kryesore, ku automjetet që po largohen nga plazhet kanë mbetur të bllokuara për orë të tëra.

Fluksi i shtuar i pushuesve ka paralizuar qarkullimin në disa segmente, ndërsa kolonat janë shtrirë deri në drejtim të aksit Lezhë–Milot.

Situata paraqitet veçanërisht e vështirë për familjet që udhëtojnë me fëmijë të vegjël, të cilët po përballen me pritje të gjata në automjete, në kushtet e temperaturave të larta.

Dalja nga zonat turistike të Shëngjinit dhe lidhja me akset kryesore vijon të jetë e vështirë, ndërsa fluksi i automjeteve pritet të mbetet i lartë edhe gjatë orëve në vijim.