TIRANË – Protesta e zhvilluar nga aktivistë dhe qytetarë në kryeqytet ka hyrë këtë të diel në ditën e 78-të, me protestuesit që janë mbledhur sërish në mbrëmje për të shprehur kundërshtimin ndaj qeverisë.

Tubimi nisi pas orës 19:00 në sheshin “Skënderbej”, ku pjesëmarrësit hodhën një sërë parullash politike, mes tyre thirrje për dorëheqjen e kryeministrit Edi Rama dhe ndryshimin e qeverisjes.

Pas grumbullimit në shesh, protestuesit marshuan përgjatë Bulevardit “Dëshmorët e Kombit” në drejtim të Kryeministrisë.

Pasi mbërritën përpara godinës së qeverisë, protestuesit vijuan me thirrje kundër qeverisë, ndërsa në podium u mbajtën edhe fjalime nga pjesëmarrësit në protestë.

Dorëheqja e kryeministrit Edi Rama dhe e qeverisë mbetet kërkesa kryesore e protestuesve, të cilët prej 78 ditësh vijojnë organizimin e tubimeve në Tiranë.

Pas përfundimit të fjalimeve, protestuesit pritet të vijojnë marshimin në rrugët e kryeqytetit, në kuadër të protestës së sotme.