VLORË – Kryeministri i Kosovës, Albin Kurti, ka reaguar pas zjarrit që përfshiu një hotel në Vlorë në orët e para të mëngjesit, ku mbetën të lënduar katër shtetas të Kosovës.

Përmes një reagimi në rrjetet sociale, Kurti tha se institucionet e Kosovës po ndjekin nga afër situatën dhe janë në komunikim me autoritetet shqiptare për gjendjen shëndetësore të të prekurve.

Sipas tij, tre nga shtetasit e Kosovës janë transportuar në Tiranë për të marrë trajtim më të specializuar, ndërsa personi i katërt po trajtohet në spitalin e Vlorës.

“Jemi të tronditur nga lajmi dhe po e monitorojmë nga afër gjendjen e qytetarëve tanë, duke qenë në komunikim të vazhdueshëm me autoritetet përkatëse në Shqipëri”, deklaroi Kurti.

Kryeministri i Kosovës u ka uruar të lënduarve shërim të shpejtë dhe të plotë.

Zjarri në hotel u raportua gjatë orëve të hershme të mëngjesit, ndërsa autoritetet shqiptare po vijojnë verifikimet për përcaktimin e rrethanave dhe shkakut të rënies së zjarrit.

Reagimi:

"Sot, në orët e hershme të mëngjesit, një zjarr përfshiu një hotel në Vlorë, ku si pasojë u lënduan katër shtetas të Republikës së Kosovës, tre prej të cilëve po marrin trajtim spitalor në Tiranë dhe një në Vlorë.

Jemi të tronditur nga lajmi dhe po e monitorojmë nga afër gjendjen e qytetarëve tanë, duke qenë në komunikim të vazhdueshëm me autoritetet përkatëse në Shqipëri. Të lënduarve u dëshiroj shërim të shpejtë dhe të plotë.", shkruan Kurti.