Aksident në Durrës, përmbyset një automjet dhe plagosen dy persona

DURRËS – Një aksident rrugor është regjistruar pasditen e kësaj të diele në aksin “Mars 91”, përballë parkimit publik pranë Stacionit të Trenit në Durrës.

Në aksident janë përfshirë dy automjete, ndërsa si pasojë e përplasjes njëri prej tyre është përmbysur në rrugë. Dy persona, burrë e grua, kanë mbetur të plagosur.

Për nxjerrjen e çiftit nga automjeti i përmbysur kanë ndërhyrë efektivë të policisë dhe kalimtarë të rastit.

Në vendngjarje ka mbërritur një ambulancë, e cila ka transportuar të lënduarit drejt Spitalit Rajonal të Durrësit për ndihmë mjekësore.

Sipas burimeve nga vendngjarja, dyshohet se një automjet tip BMW ka goditur nga pas mjetin që më pas është përmbysur. Kjo dinamikë mbetet ende për t’u konfirmuar zyrtarisht.

Grupi hetimor ka nisur veprimet për të përcaktuar shkaqet dhe rrethanat e plota të aksidentit.