Rreth 10 muaj pasi autoritetet britanike arrestuan të riun shqiptar Xhuljano Hoxha, orët e fundit është bërë e mundur që të rikthehet në Shqipëri ku pritet të vuajë një dënim penal.

Nga Interpol Tirana u krye ekstradimi nga Londra/Mbretëria e Bashkuar drejt vendit tonë i shtetasit Xhuljano Hoxha, 31 vjeç, lindur në Berat.

Hoxha  ishte shpallur në kërkim ndërkombëtar pasi Gjykata e Posaçme e Shkallës së Parë Kundër Korrupsionit dhe Krimit të Organizuar, në prill të vitit 2024, i ka caktuar masën e sigurisë “Arrest me burg”, për veprat penale “Prodhim dhe shitje e lëndëve narkotike”, “Grup i strukturuar kriminal” dhe “Kryerja e veprave penale nga organizata kriminale, ose grup i strukturuar kriminal”.

Bëhet fjalë për rastin e zbuluar dhe goditur më datë 10 nëntor 2022, në fshatin Drenovicë, qarku Berat.

Nga hetimet e kryera nga Prokuroria e Posaçme Kundër Korrupsionit dhe Krimit të Organizuar rezulton se Xhuljano Hoxha në bashkëpunim me persona të tjerë, ishte i përfshirë në kultivimin e bimëve narkotike.

Si rezultat i bashkëpunimit midis Interpol Mançester/Mbretëri e Bashkuar dhe Interpol Tiranës, u bë i mundur arrestimi dhe ekstradimi i tij në Shqipëri.

Kapja në Britani e të riut Xhuljano Hoxha, pasi kërkohej për serat me kanabis në Berat

Xhuljano Hoxha është arrestuar në Mbretërinë e Bashkuar me qëllim ekstradimin drejt Shqipërisë, pasi ishte shpallur në kërkim ndërkombëtar për përfshirjen e dyshuar në grupin kriminal që kultivonte kanabis në sera në fshatin Drenovicë të Beratit.

Sipas Policisë së Shtetit, arrestimi u bë falë bashkëpunimit mes Interpol Tiranës dhe Interpol Mançester, në kuadër të operacionit “The Wanted”.

Ndaj Hoxhës, GJKKO ka caktuar më 22 prill 2025 masën e sigurisë “Arrest në burg” për veprat penale “Kultivimi i bimëve narkotike”, “Grupi i strukturuar kriminal” dhe “Kryerja e veprave penale nga grupi i strukturuar kriminal dhe organizata kriminale”.

Ai dyshohet si pjesëtar i grupit kriminal të goditur gjatë operacionit “Stuhia” në nëntor të vitit 2022 në Drenovicë, ku policia sekuestroi rreth 870 kilogramë kanabis.

Sera ku zhvillohej aktiviteti u zbulua më 10 nëntor 2022. Ajo ishte në pronësi të Hamdi Dylit dhe ishte ndarë në katër pjesë, secila me sipërfaqe rreth dy dynymë.

Gjatë operacionit u shoqëruan dhe ndaluan mbi 100 persona, mes tyre 95 gra që ishin punësuar për pastrimin e lëndës narkotike. Sipas të dhënave të bëra publike në atë kohë, gratë, kryesisht nga Fushë-Kruja dhe Lezha, ishin joshur me pretendimin se do të punonin për vjeljen e ullinjve. Kur kishin kuptuar se bëhej fjalë për përpunim kanabisi, ato dyshohet se ishin kërcënuar që të mos largoheshin.

Në vijim të hetimeve, 11 persona u arrestuan, ndërsa në verifikim u përfshinë edhe 57 efektivë të Policisë së Beratit, mes tyre drejtues të strukturave vendore.

Dosja fillimisht u hetua nga Prokuroria e Beratit, e cila më pas shpalli moskompetencën dhe ia kaloi çështjen SPAK-ut. Hetuesit dyshojnë se pas aktivitetit të paligjshëm qëndronin dy grupe të strukturuara kriminale.