CËRRIK – Një tjetër vatër zjarri është regjistruar mesditën e kësaj të diele në qytetin e Cërrikut, duke përfshirë një parcelë me sipërfaqe të konsiderueshme me ullinj në Lagjen Nr. 1.

Zjarri është konstatuar rreth orës 12:45, ndërsa për shkak të përmasave të flakëve dhe afërsisë me zonat e banuara, në terren janë angazhuar forca dhe mjete të shumta të MZSH-së së Bashkisë Cërrik.

Flakët kanë përfshirë një sipërfaqe të mbjellë me ullinj në periferi të qytetit. Pranë parcelës ndodhen disa banesa, duke rritur rrezikun e përhapjes së zjarrit, veçanërisht për shkak të temperaturave të larta dhe kushteve të favorshme për përhapjen e flakëve.

Shërbimet zjarrfikëse po punojnë për vënien nën kontroll të situatës dhe po monitorojnë zonën për të parandaluar përhapjen e flakëve drejt banesave dhe sipërfaqeve të tjera me bimësi.

Rënia e zjarreve ka qenë e shpeshtë gjatë kësaj vere në territorin e Bashkisë Cërrik, duke mbajtur në angazhim të vazhdueshëm shërbimet zjarrfikëse lokale.