Operacioni policor ndërkombëtar për lokalizimin, kapjen dhe ekstradimin e personave të shpallur në kërkim ndërkombëtar, kapet Bujar Buja

Tiranë – Policia e Shtetit njoftoi sot se është kryer arrestim provizor i 43 vjeçarit Bujar Buja, shqiptar i Kosovës që jetonte në Holandë.

"Në Rinas, si rezultat i koordinimit të veprimeve mes Policisë Kufitare dhe Interpol Tiranës, u bë arrestimi provizor, me qëllim ekstradimi, i shtetasit Bujar Buja, 43 vjeç, lindur në Gjakovë, Kosovë dhe banues në Amsterdam, Holandë", tha Policia e Shtetit, citon noa.al.

Gjykata Qendrore e Instruksionit (Hetimit) nr. 1, pranë Audiencës Nacionale të Madridit/Spanjë, në korrik 2026, ka vendosur ndaj të akuzuarit Bujar Buja, masën e sigurisë “Arrest me burg”, për veprat penale “Trafikim të lëndëve narkotike” dhe “Pjesëmarrje në organizatë kriminale”, me qëllim tregtimin e lëndëve narkotike, parashikuar nga Kodi Penal Spanjoll.

Nga hetimet e zhvilluara nga Policia Gjyqësore Spanjolle është bërë i mundur identifikimi i një organizate kriminale të qëndrueshme, e cila dyshohet se merrej me trafikimin e kokainës, e vendosur kryesisht në Costa del Sol dhe me aktivitet në zona të ndryshme të territorit kombëtar.

Policia thotë se Bujar Buja, dyshohet se është implikuar në transportin e lëndës narkotike. /noa.al