TIRANË – Ministria e Mbrojtjes ka përditësuar situatën e zjarreve në vend, duke bërë me dije se gjatë 24 orëve të fundit janë raportuar 43 vatra zjarri. Prej tyre, 10 vijojnë të jenë aktive, ndërsa 3 të tjera janë nën monitorim.

Në operacionet për përballimin e situatës janë angazhuar 499 forca operacionale dhe 43 automjete zjarrfikëse. Forcat e Armatosura kanë kontribuar me 120 efektivë, helikopterë dhe avionë Air Tractor, ndërsa aktualisht në terren vijojnë të operojnë 120 efektivë të FA, 3 helikopterë dhe 2 avionë Air Tractor.

Një nga vatrat ku vijon ndërhyrja është Mali i Dajtit, ku po punohet për shuarjen e flakëve me mbështetjen e forcave të FA dhe mjeteve ajrore. Sipas Ministrisë së Mbrojtjes, nuk ka rrezik për zonat e banuara. Ndërkohë, vatra Priskë–Gurrë e Madhe–Farkë–Lundër është nën kontroll dhe monitorim. Edhe në Abaze të Krujës zjarri vijon të jetë aktiv, por me intensitet të ulët dhe pa rrezik për banesat.

Situatë e rëndësishme paraqitet në Gurë-Lurë të Dibrës, ku po zhvillohet një nga operacionet më të mëdha. Në terren janë angazhuar forca bashkiake, policore, ADZM, MZSH dhe Forcat e Armatosura, të mbështetura nga dy avionë Air Tractor. Hapja e korridoreve ka ndaluar avancimin e flakëve drejt zonave të banuara.

Ndërkohë, operacione dhe monitorime po vijojnë edhe në Qafë Helmes, Lufaj e Thari në Mirditë, Fushë-Lajë e Rrjoll në Shkodër dhe Dardhë të Librazhdit. Autoritetet po përdorin edhe dronë për monitorimin e vatrave në terrene të vështira, ndërsa Agjencia Kombëtare e Mbrojtjes Civile vijon koordinimin dhe monitorimin e situatës në të gjithë territorin.