TEXAS, SHBA – Një mësues nga Teksasi është bërë viral në rrjetet sociale pasi shpërtheu në lot gjatë një videoje, teksa tregonte vështirësitë që kishte hasur me nxënësit e tij maturantë gjatë një ore mësimi.

Darius Williams, mësues në shkollën e mesme Wheatley, pjesë e Distriktit Shkollor të Hjustonit, tha se nuk kishte mundur të përfundonte orën e parë të mësimit në ditën e dytë të shkollës. Sipas tij, arsyeja lidhej me vështirësitë e mëdha që nxënësit shfaqnin në lexim dhe shkrim.

Williams tregoi se u kishte dhënë maturantëve dy paragrafë për të lexuar dhe më pas u kishte kërkuar të plotësonin një fjali, të cilën ai tha se pothuajse e kishte përfunduar vetë. Pavarësisht ndihmës dhe udhëzimeve, nxënësit nuk arritën të përfundonin ushtrimin.

“Janë 17 dhe 18-vjeçarë dhe nuk mundën të përfundonin katër fjalë”, tha mësuesi i emocionuar, duke shtuar se para ushtrimit u kishte dhënë nxënësve edhe skenarin, kishte marrë shënime së bashku me ta dhe u kishte treguar përgjigjet.

Sipas Williams, situata është veçanërisht shqetësuese pasi bëhet fjalë për maturantë që, sipas tij, kanë aftësi për të komunikuar, argumentuar dhe mbrojtur pikëpamjet e tyre, por hasin vështirësi kur duhet t’i shprehin ato nëpërmjet shkrimit. Videoja e tij ka marrë vëmendje të madhe në rrjetet sociale, duke nxitur diskutime mbi nivelin e aftësive bazë të nxënësve dhe sfidat me të cilat përballen mësuesit.