FINIQ – Një zjarr i përmasave të mëdha ka përfshirë mëngjesin e kësaj të diele restorantin në resortin “Mesopotam Agroturizëm”, përgjatë aksit rrugor Sarandë–Syri i Kaltër.

Zjarri dyshohet se ka rënë rreth orës 05:30, ndërsa flakët janë përhapur me shpejtësi në ambientet e restorantit, duke shkaktuar dëme të konsiderueshme materiale. Struktura është shkrumbuar plotësisht nga zjarri.

Pas marrjes së njoftimit, në vendngjarje kanë mbërritur shërbimet zjarrfikëse të Finiqit, të cilat kanë ndërhyrë për izolimin e flakëve.

Pas ndërhyrjes së tyre është bërë i mundur frenimi i zjarrit dhe është shmangur përhapja e tij drejt kabinave prej druri që ndodheshin pranë restorantit dhe janë pjesë e kompleksit.

Nga informacionet paraprake, dyshohet se zjarri mund të jetë shkaktuar nga një shkëndijë ose një defekt në rrjetin elektrik. Megjithatë, shkaku i saktë ende nuk është përcaktuar.

Ekspertët kanë nisur verifikimet në vendngjarje për të dokumentuar dëmet dhe për të përcaktuar rrethanat e plota të rënies së zjarrit.

Për momentin nuk dihen shkaqet e rënies së zjarrit. Pritet që hetimet dhe verifikimet në vendngjarje të përcaktojnë se çfarë ka shkaktuar flakët.

Mesopotam Agroturizëm konsiderohej një prej investimeve më të rëndësishme turistike të realizuara vitet e fundit në zonën e Mesopotamit. Resorti ishte ndërtuar rreth tre vite më parë dhe ishte kthyer në një pikë të njohur përgjatë rrugës që lidh Sarandën me Syrin e Kaltër.

Zjarri i mëngjesit të sotëm ka lënë pas dëme të mëdha materiale, ndërsa deri tani nuk raportohet për persona të lënduar.