FUSHË-KRUJË – Dalin detaje të reja nga shpërthimi me lëndë të dyshuar plasëse që ndodhi gjatë natës në fshatin Zallë të Fushë-Krujës.

Sipas informacioneve paraprake të Policisë, lënda plasëse ishte vendosur në derën e banesës së shtetasit Ylli Zalla. Shpërthimi ka shkaktuar dëmtime në banesë, ndërsa më pas flakët kanë përfshirë edhe automjetin e pronarit, i cili ishte i parkuar pranë banesës.

Automjeti është djegur plotësisht, ndërsa ngjarja ka shkaktuar panik te banorët e zonës, për shkak të fuqisë së shpërthimit dhe zjarrit të shkaktuar pas tij.

Menjëherë pas ngjarjes, në vendngjarje kanë mbërritur shërbimet e Policisë dhe grupi hetimor. Ekspertët po punojnë për mbledhjen e provave materiale dhe dokumentimin e plotë të vendit të ngjarjes.

Paralelisht, vijojnë hetimet për identifikimin dhe kapjen e autorit ose autorëve, ndërsa po punohet edhe për zbardhjen e motiveve që qëndrojnë pas këtij sulmi.

Deri në këto momente, autoritetet nuk kanë bërë të ditur nëse ka persona të lënduar nga shpërthimi.