FUSHË-KRUJË – Një shpërthim me lëndë të dyshuar plasëse është regjistruar gjatë natës në fshatin Zallë të Fushë-Krujës.

Sipas informacioneve paraprake të policisë, lënda e dyshuar plasëse është vendosur në derën e banesës së shtetasit Ylli Zalla. Nga shpërthimi janë shkaktuar dëme materiale, ndërsa flakët kanë përfshirë edhe automjetin në pronësi të tij, i cili ishte i parkuar pranë banesës.

Në vendngjarje ka mbërritur grupi hetimor, i cili po punon për dokumentimin e provave, identifikimin dhe kapjen e autorit, si dhe për zbardhjen e plotë të rrethanave dhe motiveve të ngjarjes.

Policia vijon hetimet për të përcaktuar nëse sulmi ka qenë i qëllimshëm dhe për të identifikuar personat përgjegjës.

Njoftimi i Policisë:

“Gjatë natës, në fshatin Zallë, Fushë-Krujë, në derën e banesës së shtetasit Y. Z., dyshohet se është vendosur dhe ka shpërthyer një sasi e dyshuar lënde plasëse. Si pasojë, janë shkaktuar dëme materiale, si dhe ka marrë flakë dhe është djegur automjeti në pronësi të këtij shtetasi, i cili ishte i parkuar pranë banesës. Grupi hetimor po vijon punën për identifikimin dhe kapjen e autorit, si dhe për dokumentimin e plotë të rrethanave të rastit.”