TIRANË – Qiratë afatgjata po fitojnë terren në tregun e pasurive të paluajtshme, ndërsa avantazhi ekonomik i qiradhënies ditore po ngushtohet.

Kalimi i një numri të madh apartamentesh drejt platformave të qirasë ditore ka reduktuar ofertën për banim afatgjatë dhe ka ushtruar presion në rritje mbi çmimet, veçanërisht në Tiranë.

Në gjashtëmujorin e parë të vitit 2026, qiraja mesatare mujore për një apartament 1+1 arriti në 590 euro, me një rritje prej 4.4% krahasuar me të njëjtën periudhë të vitit të kaluar. Për apartamentet 2+1, qiraja mesatare u ngjit në 954 euro, rreth 26% më shumë në bazë vjetore.

Në disa prej zonave më të kërkuara të kryeqytetit, çmimet janë edhe më të larta, ndërsa alternativat më të përballueshme po bëhen gjithnjë e më të pakta edhe në periferi.

Qiratë ditore kanë reduktuar ofertën afatgjatë

Agjentët imobiliarë e lidhin rritjen e çmimeve me kombinimin e kërkesës së lartë, ofertës së kufizuar dhe orientimit të një pjese të konsiderueshme të pronave drejt Airbnb dhe platformave të ngjashme.

Në gjashtëmujorin e parë të vitit 2026, në të gjithë vendin numëroheshin rreth 27.7 mijë njësi të listuara për qira ditore, nga rreth 3 mijë disa vite më parë. Vetëm në Tiranë ishin të listuara rreth 5.5 mijë njësi.

Kjo zhvendosje ka ngushtuar stokun e banesave të disponueshme për familjet, studentët dhe profesionistët që kërkojnë kontrata afatgjata.

Airbnb nuk është më aq fitimprurëse sa më parë

Megjithatë, diferenca mes qirasë ditore dhe asaj afatgjatë po zvogëlohet.

Në Tiranë, të ardhurat mesatare nga një pronë e listuar në Airbnb ishin rreth 25.5 euro në ditë gjatë gjashtëmujorit të parë të vitit 2026, ose rreth 765 euro në muaj nëse prona do të gjeneronte të ardhura çdo ditë.

Por kjo është një vlerë bruto. Nga të ardhurat duhet të zbriten shpenzimet për energjinë, ujin, pastrimin, mirëmbajtjen, komisionet e platformave, amortizimin dhe detyrimet tatimore.

Për rrjedhojë, të ardhurat neto mund të jenë ndjeshëm më të ulëta.

Ndërkohë, në disa zona të Tiranës, qiratë mujore afatgjata kanë arritur nivele që i afrohen ose tejkalojnë të ardhurat bruto të qirasë ditore.

Në Astir, një apartament 1+1 jepet mesatarisht për rreth 550 euro në muaj, ndërsa në Zogun e Zi çmimi arrin rreth 620 euro. Në ish-Bllok, qiraja mesatare shkon në rreth 700 euro, ndërsa pranë stadiumit “Air Albania” arrin rreth 800 euro.

Për apartamentet 2+1, qiratë në zonat më të kërkuara lëvizin nga 900 deri në 1,500 euro në muaj.

Pronarët po rishikojnë llogaritë

Këto zhvillime po ndryshojnë gradualisht llogaritjen e pronarëve. Qiraja afatgjatë ofron të ardhura më të qëndrueshme, me më pak periudha bosh dhe kosto më të ulëta administrimi.

Në të kundërt, qiraja ditore kërkon menaxhim të vazhdueshëm dhe është më e ekspozuar ndaj sezonalitetit, konkurrencës dhe luhatjeve të kërkesës.

Në këtë drejtim, edhe formalizimi i tregut po ndikon në zgjedhjet e pronarëve.

Individët që japin prona me qira përmes Airbnb dhe Booking duhet të deklarojnë të ardhurat në DIVA dhe t’i nënshtrohen tatimit 15%.

Administrata Tatimore ka bërë të ditur se gjatë vitit 2024 u identifikuan më shumë se 8,400 individë dhe subjekte me të ardhura nga Airbnb, ndërsa vlera e rezervimeve arriti në rreth 3.8 miliardë lekë.

Qiraja ditore po profesionalizohet

Për pronarët që disponojnë vetëm një ose dy apartamente, kostot e menaxhimit dhe detyrimet fiskale po e bëjnë qiranë afatgjatë një alternativë më të thjeshtë dhe më të parashikueshme.

Ndërkohë, qiraja ditore po përqendrohet gjithnjë e më shumë te operatorët profesionistë dhe agjencitë që menaxhojnë një numër të madh pronash.

Nëse kjo tendencë do të vazhdojë, tregu pritet të ndahet gjithnjë e më qartë mes pronarëve që preferojnë sigurinë e një kontrate afatgjatë dhe operatorëve profesionistë që kanë kapacitetin për të përballuar kostot dhe kompleksitetin e menaxhimit të qirasë ditore.