VLORË – Një prej pushuesve nga Kosova, i cili mbeti i plagosur nga zjarri që përfshiu një hotel në zonën e Lungomares në Vlorë, ka rrëfyer momentet e frikës gjatë ngjarjes.

Nga barela në spital, i riu tha se gjithçka ka ndodhur rreth orës 04:00 të mëngjesit, kur ai dhe personat e tjerë që ndodheshin në hotel kanë konstatuar praninë e tymit.

Sipas dëshmisë së tij, ata dolën në korridor, por situata u përkeqësua shpejt. Për shkak të flakëve, u kthyen në dhomë dhe më pas dolën në ballkon, nga ku u detyruan të hidhen për të shpëtuar.

“Ishim në gjumë në orën 4 të mëngjesit, nuk e di. Dolëm në korridor, pamë shumë tym. Mbyllëm derën, shkuam në ballkon, flakë. Kërcyem nga ballkoni, kam rënë në beton, a nuk e di”, rrëfeu ai.

Zjarri në hotel ka shkaktuar 7 të plagosur, ndërsa tre prej tyre janë transportuar drejt Tiranës për trajtim më të specializuar. Katër të tjerë ndodhen në spital, ku po marrin trajtimin e nevojshëm mjekësor.

Policia dhe strukturat e emergjencës kanë mbërritur në vendngjarje, ndërsa vijojnë hetimet për përcaktimin e shkaqeve të zjarrit dhe rrethanave të ngjarjes.