VLORË – Një zjarr ka përfshirë në orët e para të mëngjesit një hotel në zonën e Lungomares në Vlorë, duke shkaktuar plagosjen e shtatë personave.

Sipas informacioneve paraprake, flakët kanë nisur në katin e parë të godinës dhe më pas janë përhapur në katin e dytë dhe në fasadën e objektit.

Për t’u shpëtuar flakëve dhe tymit, disa prej personave që ndodheshin brenda godinës janë detyruar të dalin nga dritaret, duke pësuar dëmtime.

Të shtatë të plagosurit janë transportuar për në spital. Tre prej tyre, për shkak të gjendjes më të rënduar shëndetësore, janë nisur drejt Tiranës për trajtim më të specializuar, ndërsa katër të tjerë ndodhen në sallën e operacionit.

Sipas të dhënave paraprake, gjashtë prej të dëmtuarve janë shtetas shqiptarë nga Kosova, ndërsa një tjetër është nga Rrësheni.

Në vendngjarje kanë mbërritur shërbimet e Policisë dhe strukturat e emergjencës, ndërsa kanë nisur hetimet për përcaktimin e shkakut dhe rrethanave të zjarrit.

Autoritetet pritet të japin më shumë informacion në vijim lidhur me gjendjen shëndetësore të të plagosurve dhe shkaqet që çuan në përhapjen e flakëve.