Banorët e Divjakës kanë vijuar për të 16-tën ditë radhazi protestën kundër reformës territoriale, duke kërkuar ruajtjen e statusit të Bashkisë Divjakë.

Protesta e mbrëmjes së sotme është zhvilluar në një format ndryshe nga tubimet e mëparshme. Organizatorët kanë zgjedhur që në qendër të saj të vendosin traditën dhe vlerat historike e kulturore të zonës.

Në kuadër të protestës u organizua një mini-koncert me këngë dhe valle tradicionale, të trashëguara brez pas brezi.

Pas përfundimit të aktivitetit artistik, protestuesit vijuan me fjalime dhe më pas marshuan në rrugët e qytetit, duke përsëritur thirrjen “Divjaka Bashki”.

Në përfundim të tubimit, organizatorët u bënë thirrje qytetarëve që të bashkohen në numër edhe më të madh në protestën e radhës, duke paralajmëruar vijimin e qëndresës kundër reformës territoriale.