Kryeministri Edi Rama ka komentuar protestat e zhvilluara gjatë muajve të fundit në Shqipëri në një intervistë për median britanike UnHerd, duke argumentuar se ato janë një shprehje e një shoqërie demokratike dhe nuk përbëjnë një kërcënim për qeverinë.

Rama tha se protestat e fundit kanë ndryshuar në krahasim me ato të muajit qershor, pasi në to, sipas tij, janë përfshirë më shumë parti politike dhe grupime opozitare, përfshirë edhe forca nga ekstremi i majtë dhe i djathtë.

Pavarësisht tensioneve politike, kryeministri u shpreh se është “shumë krenar” për faktin që protestat kanë vijuar për ditë me radhë në mënyrë kryesisht paqësore.

Sipas Ramës, mundësia që qytetarët të protestojnë në bulevard pa u penguar është një tregues se Shqipëria po sillet si një vend normal evropian, ku protestat janë pjesë e jetës demokratike.

Rama: Protestat nuk përfaqësojnë të gjithë shoqërinë

Kryeministri hodhi poshtë pretendimin se protestat përfaqësojnë në tërësi shoqërinë shqiptare.

Ai argumentoi se një pjesë e konsiderueshme e pjesëmarrësve në protestat e fundit kanë lidhje me partitë opozitare dhe grupime politike që synojnë largimin e qeverisë.

Rama u ndal gjithashtu te roli i rrjeteve sociale në mobilizimin e qytetarëve. Sipas tij, një pjesë e madhe e përmbajtjeve që kanë ndikuar në nxitjen dhe përhapjen e protestave është prodhuar jashtë Shqipërisë.

Në këtë kontekst, ai përmendi edhe debatin rreth Jared Kushner, Ivanka Trump dhe projekteve turistike të diskutuara në Shqipëri.

“Algoritmi bëri shumë për t’i sjellë njerëzit në bulevard”

Rama tha se rrjetet sociale kanë ndikuar ndjeshëm në përhapjen e protestave dhe në rritjen e vëmendjes ndërkombëtare ndaj tyre.

“Algoritmi bëri shumë për t’i sjellë njerëzit në bulevard”, u shpreh kryeministri, duke argumentuar se lidhja e protestave me Kushner dhe familjen Trump ka ndikuar në amplifikimin e tyre në rrjetet sociale.

Sipas tij, kjo çështje ka tërhequr gjithashtu persona që janë kundër Donald Trump dhe që, përmes rrjeteve sociale, kanë kontribuar në përhapjen e protestave.

Qëndrimi për Zvërnecin dhe Sazanin

Në lidhje me projektet e zhvillimit në Zvërnec dhe Sazan, Rama ka mbrojtur qëndrimin se protestat nuk duhet të interpretohen si provë se projektet kanë nisur apo se zonat e mbrojtura janë cenuar.

Në intervistën për UnHerd, kryeministri e paraqet situatën aktuale si një shprehje të pakënaqësisë politike dhe sociale në një vend që, sipas tij, ka ndryshuar ndjeshëm në aspektin ekonomik gjatë viteve të qeverisjes së tij.

Rama argumenton se protestat janë pjesë e një Shqipërie që po përjeton ndryshime sociale dhe politike, ndërsa kundërshton interpretimin e tyre si shenjë të një krize të regjimit.