Një student 18-vjeçar ka bërë një zbulim të jashtëzakonshëm gjatë punës së tij sezonale në një kantier ndërtimi në Belgjikë. I riu ka gjetur një thesar të fshehur me ar, vlera e të cilit vlerësohet në rreth 9 milionë euro.

Studenti, i identifikuar si Kobe, po punonte së bashku me kolegët në gërmimet për vendosjen e tubacioneve të reja të kanalizimeve, kur në tokë vunë re disa objekte që shkëlqenin.

“Në fillim mendova se ishin monedha 1-euroshe. Nisëm t’i nxirrnim nga dheu dhe më pas pamë një shufër ari. Atëherë kuptuam se bëhej fjalë për diçka shumë më të rëndësishme”, tregoi 18-vjeçari për median belge VTM.

Thesari ishte fshehur në një mur

Zbulimi është bërë në zonën e një ish-fabrike birre në Sint-Gillis-Dendermonde, rreth 30 kilometra në veriperëndim të Brukselit.

Sipas të dhënave paraprake, thesari përbëhet nga monedha ari, copëza ari dhe shufra ari të numëruara. Ato ishin vendosur brenda një thesi dhe ishin fshehur në një mur me tulla, në bodrumin e një vile të ndërtuar në fund të shekullit XIX.

Pas zbulimit, punëtorët njoftuan policinë dhe organizatën përgjegjëse për restaurimin e godinës. Thesari u transportua në një vend të sigurt në Bruksel, ndërsa autoritetet kanë nisur hetimet për të përcaktuar origjinën dhe pronësinë e tij.

Kush do ta marrë thesarin?

Prokuroria e Flandrës Lindore pritet të verifikojë fillimisht nëse ari është i lidhur me ndonjë vjedhje apo aktivitet kriminal.

Vetëm pas përfundimit të këtyre verifikimeve do të përcaktohet se kush ka të drejtë ligjore mbi thesarin. Çështja mund të jetë komplekse, pasi pretendime për pronësinë mund të paraqiten nga kompania e ndërtimit, organizata që po kryen restaurimin e godinës ose pasardhësit e familjes që ka zotëruar dikur pronën.

Ndërkohë, 18-vjeçari që e zbuloi thesarin duket se ka përjetuar një nga ditët më të pazakonta të punës së tij sezonale, pasi një gërmim për kanalizime e çoi papritur te një pasuri me vlerë miliona euro.