Një kartel ndërkombëtar droge u shkatërrua në Selanik – Kishte fshehur 324 kilogramë kanabis në letër të ricikluar. Substancat do të përfundonin nga Shqipëria në Turqi, nëpërmjet Greqisë – Përfitimi i paligjshëm është mbi 700,000 euro

Një organizatë kriminale që dyshohet se shtrihej në disa vende të rajonit, nga Shqipëria përmes Greqisë deri në Turqi, është goditur nga autoritetet greke pas një operacioni të zhvilluar në Selanik.

Gjatë aksionit, policia greke ka arrestuar dy persona, 58 dhe 43 vjeç, ndërsa një person i tretë është shpallur në kërkim.

Substancat do të përfundonin nga Shqipëria në Turqi, nëpërmjet Greqisë – Përfitimi i paligjshëm është mbi 700,000 euro.

Sipas hetimeve të autoriteteve greke, grupi kishte një strukturë të organizuar dhe përdorte kamionë të transportit ndërkombëtar për të lëvizur sasi të mëdha kanabisi të papërpunuar nga Shqipëria drejt Turqisë.

Për të shmangur kontrollet e autoriteteve, droga dyshohet se fshihej në hapësira të posaçme brenda ngarkesave të ligjshme me materiale për riciklim.

Operacioni u zhvillua në një ambient të mbyllur në Selanik, ku dy të dyshuarit u kapën në flagrancë. Në vendngjarje u gjetën 8 paleta me letër për riciklim, brenda të cilave ishin fshehur pako me kanabis të papërpunuar.

Sipas policisë greke, sasia totale e drogës së sekuestruar ishte 324 kilogramë e 474 gramë.

Autoritetet vlerësojnë se vlera e përfitimit që organizata kriminale synonte të siguronte nga kjo ngarkesë arrinte në rreth 700 mijë euro.

Dy personat e arrestuar janë dërguar pranë organit kompetent të akuzës, ndërsa hetimet vijojnë për identifikimin dhe arrestimin e personave të tjerë që dyshohet se janë të përfshirë në aktivitetin kriminal në Shqipëri dhe Turqi.

Çfarë deklaroi policia greke

Tonelata letre nga Maqedonia e Veriut përfundonin në një kompani në Selanik. Më pas, fshihnin drogën brenda paletave me letër për riciklim. Ngarkesa e ligjshme dhe ajo e paligjshme do të përfundonin në Turqinë fqinje përmes kamionëve të transportit ndërkombëtar. Në këtë mënyrë, anëtarët e organizatës kriminale synuan të mashtronin autoritetet greke, por në fund përfunduan me… pranga.

Në një operacion të zhvilluar mëngjesin e së premtes, 14 gusht, në Bashkinë Delta të Selanikut, u arrestuan dy persona, të moshës 58 dhe 43 vjeç, nga Maqedonia e Veriut dhe Kosova, brenda ambienteve të kompanisë.

Siç shihet edhe në videon e publikuar nga Policia Greke, brenda paletave me letër ishte krijuar hapësira e përshtatshme për të fshehur ngarkesën e paligjshme të drogës.

“Në total, nga kontrollet e kryera, u gjetën dhe u sekuestruan: kanabis i papërpunuar, me peshë 324 kilogramë e 474 gramë, një gjysmërimorkio, 2 automjete, 2 pajisje telefoni celular, një targë automjeti e autoriteteve të huaja, 11 çanta bosh pranë vendit ku u sekuestruan lëndët narkotike dhe shuma prej 1.165 eurosh”.

“Marifeti” me riciklimin dhe rolet e anëtarëve

Përveç dy personave të arrestuar, autoritetet njohin edhe të dhënat e një personi të tretë, me origjinë nga Maqedonia e Veriut, i cili “kishte marrë përsipër koordinimin e përgjithshëm të veprimeve në Greqi për trafikun e lëndëve narkotike dhe, në veçanti, gjetjen e ambienteve të përshtatshme për magazinimin e përkohshëm të tyre, si dhe krijimin e vendeve të fshehta brenda ngarkesave me letër për riciklim, ku fshiheshin drogat, duke marrë njëkohësisht përsipër kontaktet me furnizuesit dhe koordinimin e drejtuesve të kamionëve për transportin e mëtejshëm të lëndëve narkotike nga Greqia drejt Turqisë”.

Grupi kriminal funksiononte me hierarki të rreptë dhe organizim profesional. Për të kaluar pa u vënë re nga kontrollet, personat e përfshirë përdornin kamionë të transportit ndërkombëtar që transportonin ngarkesa të ligjshme me letër për riciklim. Brenda paletave kishin krijuar vende të posaçme dhe të padukshme fshehjeje, duke siguruar kështu pamjen e ligjshmërisë së itinerareve të tyre.

Rolet ishin plotësisht të ndara. “Koka” e grupit, i cili është në kërkim, kishte koordinimin e përgjithshëm në territorin grek. Ai merrej me gjetjen e ambienteve të magazinimit, krijimin e vendeve të fshehta brenda letrës për riciklim, kontaktet me furnizuesit dhe udhëzimin e shoferëve për transportin drejt Turqisë.

43-vjeçari i arrestuar ishte përgjegjës për marrjen e hashashit nga Shqipëria dhe fshehjen e kujdesshme të tij në paletat me letër, duke përgatitur terrenin për tranzitin.

58-vjeçari i arrestuar ofronte mbështetje në të gjitha fazat e transportit, fshehjes dhe dorëzimit përfundimtar të ngarkesës drejt territorit turk.

Droga u gjet brenda paletave. Konkretisht, gjatë operacionit, dy të arrestuarit u kapën në flagrancë duke poseduar 8 paleta me letër të riciklueshme. Katër prej tyre ishin tashmë të ngarkuara në një gjysmërimorkio, ndërsa 4 të tjerat ndodheshin pranë saj. Brenda vendeve të posaçme të fshehjes në ngarkesë, policët gjetën sasinë e jashtëzakonshme të lëndëve narkotike.

Përllogaritet se përfitimi i pritshëm i paligjshëm financiar nga veprimtaria e organizatës tejkalon 700.000 euro. Të arrestuarit u dërguan pranë autoritetit kompetent të prokurorisë, ndërsa hetimet për identifikimin dhe lokalizimin e bashkëpunëtorëve të tyre në Shqipëri dhe Turqi vazhdojnë.