Policia e Elbasanit ka arrestuar një 52-vjeçar, të dyshuar si autor i atentatit të dështuar ndaj 50-vjeçarit Mir Bitoci, ngjarje e ndodhur mesditën e së shtunës në lagjen “28 Nëntori”.

I arrestuari është identifikuar si Poli Boriçi, 52 vjeç.

Sipas policisë, rreth orës 13:00 u raportua se në ambientet e jashtme të një lokali në lagjen “28 Nëntori”, një person kishte tentuar të vriste me armë zjarri 50-vjeçarin, i identifikuar zyrtarisht me inicialet E. K. (Ermir Bitoci, alias Ermir Këndezi.)

Pas marrjes së njoftimit, shërbimet e Policisë organizuan menjëherë operacionin për identifikimin dhe kapjen e autorit të dyshuar. Në kuadër të operacionit të koduar “Reagimi”, uniformat blu arritën të identifikojnë dhe arrestojnë 52-vjeçarin.

Gjatë veprimeve policore u gjet dhe u sekuestrua edhe një pistoletë, e cila dyshohet se është arma e përdorur në tentativën për vrasje.

Hetimet po vijojnë nën drejtimin e Prokurorisë së Elbasanit, me qëllim zbardhjen e plotë të rrethanave të ngjarjes, si dhe dokumentimin ligjor të saj.

Deri në përfundim të hetimeve dhe një vendimi gjyqësor të formës së prerë, 52-vjeçari prezumohet i pafajshëm.