KOSOVË – Kriza institucionale në Kosovë vijon, ndërsa Partia Demokratike e Kosovës (PDK) dhe Aleanca kanë refuzuar ftesën e ushtrueses së detyrës së presidentes, Albulena Haxhiu, për takimin konsultativ të 18 gushtit.

Në këtë situatë, kryesuesi i seancës konstituive të Kuvendit, Avni Dehari nga Lëvizja Vetëvendosje, ka bërë thirrje për arritjen e një marrëveshjeje politike para vijimit të punës së Kuvendit.

Dehari ka mirëpritur ftesat e Haxhiut dhe kryetarit të LVV-së, Albin Kurti, duke u bërë thirrje partive politike që të ulen në tryezë dhe të gjejnë një zgjidhje për krizën institucionale.

Sipas tij, vazhdimi i seancës pa një marrëveshje paraprake për zgjedhjen e presidentit rrezikon të thellojë përplasjet politike dhe mund ta çojë vendin drejt zgjedhjeve të parakohshme.

PDK-ja dhe Aleanca, nga ana tjetër, kërkojnë vazhdimin e seancës konstituive të Kuvendit, e cila nisi më 6 gusht dhe u ndërpre për shkak të mungesës së një marrëveshjeje politike. Aleanca ka akuzuar LVV-në se po zvarrit bllokadën institucionale për ta çuar vendin në zgjedhje.

Ndërkohë, LDK-ja ka deklaruar se është e gatshme të votojë për një figurë jopartiake për president dhe se nuk kërkon poste institucionale.

Kriza institucionale vijon pas zgjedhjeve të 7 qershorit. LVV-ja siguroi 53 ulëse në Kuvend, PDK-ja 22, LDK-ja 18 dhe AAK-ja shtatë.

Për zgjedhjen e presidentit kërkohet prania e të paktën 80 deputetëve në sallë në dy rundet e para të votimit. Nëse presidenti nuk zgjidhet as në rundin e tretë, Kuvendi shpërndahet dhe Kosova shkon në zgjedhje të reja.