TIRANË — Qarkullimi i automjeteve në aksin kryesor Tiranë–Durrës i është rikthyer normalitetit, pasi Autoriteti Rrugor Shqiptar (ARRSH) njoftoi përfundimin e ndërhyrjes për montimin e trarëve metalikë të mbikalimit të ri në Kashar.

Puna në terren u zhvillua gjatë natës, duke u mbyllur përpara afatit të parashikuar. Megjithëse bllokimi i përkohshëm ishte planifikuar deri në orët e para të mëngjesit të së shtunës me devijim të lëvizjes në korsitë e majta (ndërsa qarkullimi drejt Rinasit mbeti i paprekur), angazhimi me mjete dhe punëtorë të shtuar bëri të mundur hapjen e plotë të autostradës pa krijuar probleme për udhëtarët.

Njoftimi:

Përfundojnë përpara afatit punimet për montimin e trarëve metalikë të mbikalimit të ri në Kashar!

Falë angazhimit me mjete dhe punëtorë të shtuar punimet për montimin e trarëve metalikë të mbikalimit të ri në Kashar kanë përfunduar përpara parashikimit, duke mundësuar vijimin normal të qarkullimit në aksin Tiranë–Durrës.

Sot, qarkullimi në aksin Tiranë–Durrës do të vijojë normalisht.