TIRANË — Pse njerëzit shpesh kanë tendencën të dashurohen ose të investohen emocionalisht te personat që nuk i duan apo që i refuzojnë? Kësaj pyetjeje i ka dhënë përgjigje psikologia e njohur Loreta Caka.

Sipas psikologes, fenomeni nuk ka lidhje me ndjenjën e vërtetë, por me mënyrën se si truri ynë reagon ndaj vështirësive dhe sfidave.

Truri e sheh refuzimin si sfidë, jo si fund

E pyetur mbi këtë prirje njerëzore, psikologia Caka shpjegon se në raste të tilla njerëzit nuk dashurojnë personin real, por idealizojnë pamundësinë, ftohtësinë dhe refuzimin.

Sfidë e keqkuptuar: "Truri ynë shpeshherë këtë nuk e sheh si refuzim, por e sheh si sfidë. Ne jemi mësuar të sfidojmë veten tonë jo vetëm në dashuri, por dhe në çdo lloj konteksti tjetër të jetës," u shpreh ajo, duke shtuar se në dashuri ky mekanizëm është i gabuar sepse na bën të palumtur.

Dallimi mes dashurisë dhe obsesionit: Caka thekson se dashuria e vërtetë nuk kërkon sakrifica të vetëshkatërrimit dhe nuk bazohet te sfidat e vazhdueshme. "Dashuria të fal qetësi, dashuria të jep siguri, dashuria të jep rehati. Nuk të jep dashuria sfida, nuk të thotë dashuria humb veten ti për të më arritur mua. Ky është thjesht obsesion."

Psikologia bën një paralelizëm me jetën e përditshme dhe botën e punës, ku sfidat shpërblehen me benefite. Megjithatë, në një lidhje të njëanshme, i vetmi rezultat përfundimtar është humbja e vetvetes, ndërkohë që nga partneri nuk merret asnjë dashuri apo vëmendje mbrapsht.